Himoa nga leksiyon

Kinsa’y nag-ingon nga ang media dili dakpon sa kapolisan kon masakpan nga makahimo og supak sa balaod? Dakpon gihapon uy, ug mao kini ang gihimo sa kapolisan diha sa Minglanilla.

Mao kana ang rason nga awhagon nako ang mga kauban ko nga sakop sa media nga motuman gyud ta sa balaod aron dili kita maunay nga maoy mabalita.

Daghang sakop sa media ganahan kaayo nga mohupot og armas nga mobuto, apan tapolan nga molukat og LTOPF, kun License To Own and Posses Firearms.

Kon masayod ko nga ang usa ka sakop sa media milukat og LTOPF aron nga mahimong legal ang paghupot niya’g armas, modayeg gyud ko niini.

Busa, ang nahitabo sa atong kauban nga gironda didto sa iyang panimalay ug matud sa kapolisan ilang nasakmitan og tulo ka armas nga way lisensya, himoa kini nga leksyon.

* * *

Awhagon nako ang kadagkoan sa Department of Engineering and Public Works (DEPW) sa Cebu City nga dalion nila ang pagsurvey sa aseras diha sa Taboan District, ilabi na sa Lakandula ug B. Aranas Streets.

Ang programa ni Mayor Michael Rama mao nga hawanan gyud ang mga karsada ug aseras aron magamit kini sa publiko. Unya kay ang tag-iya sa panimalay diha sa Lakandula Street atubangan sa Taboan, nangangkon man nga ila kuno ang aseras, ipasukod nato sa DEPW.

Usbon nako, suheto sa maong dapit kay kaniadtong mga 1970’s, nakaestar ko diha sa kanhi Botica Saint Mary nga nahimutang sa eskina Lakandula ug B. Aranas ug lapad kaayo ang aseras dihang dapit.

Tungod lagi sa pagpabaya sa mga nagdumala kaniadto sa opisina sa City Hall, ang kanhi Demolition Team, unya giilisan og nga’n nga Squatters Prevention Encroachment and Elimination Division (SPEED), aw gipang-ukopar sa mga mapahimuslanon ang aseras nga para unta sa publiko.

Karon nindot ni kay si Mayor Rama, desidido nga bawion ang maong mga karsada ug aseras nga giilog sa mga mapahimuslanon. Mao nga kamong mga gitugyanan sa mga katungdanan sa City Hall, buhata ang inyong tahas.

Nalipay ko kay abtik kaayo ang akong mga amiga nga sila si Raquel Arce ug Grace Luardo nga maoy nagdumala sa PROBE, (kaniadto ug karon) mihimo na lakang pagbawi sa luna.

Unta, ang DEPW dili magduka-duka sa ilang katungdanan kabahin niining maong isyu. Bag-o ra ba ang pangulo sa DEPW, wa pa gani mi magkahimamat niya, palihug ipadali kini sa imong mga tawo sir.

Himoi dayon ninyo og survey aron nga kasugdan na ang pagbawi nato sa aseras nga gustong angkunon sa mga mapahimuslanon.