Pastilan

Si Senador Robinhood Padilla miduso og kontrobersyal nga balaodnon, nga kon maaprobahan, magtugot na og “same-sex marriage” dinhi sa atong nasud.

Sa ato pa, kon maaprobahan ang gisugyot nga balaodnon ni Padilla, mahimo na nga magminyo ang mga lalaki ug ang mga bayot nilang uyab, ingon man ang mga babaye ug mga tomboy.

Ang New Family Code sa Pilipinas wa magtugot og same-sex marriage kay kadaghanan lagi kuno nato mga Katoliko, ug law-ay kaayo paminawon ang pagminyo sa parehong lalaki, ug parehong babaye.

Sa mga demokrasya nga nasud, ang pamaagi mao nga “majority rule.” Ambot unsaon kaha pagsuta ang majority diha sa Senado, aw ang botos tingali sa mga senador.

Ang mga kongresista, kapin man sila sa 200 diha sa Kongreso, ambot uyon kaha sila sa same-sex marriage? Ang mga opisyal nato sa simbahan, uyon kaha?

Pero, pagka karon, bisan og wala itugot sa atong balaod ang pagtipon sa mga parehong lalaki, ug parehong babaye isip magtiayon, naa na baya’y naghimo niini.

Ang rason nga dunay uban nga wa gyud makagusto sa same-sex marriage kay law-ay lagi kuno kay Katoliko man nga nasud ang Pilipinas.

Apan mao lagi, kon uyonan man gyud ni sa atong mga magbabalaod ang gisugyot nga balaodnon ni Padilla, wa ta’y mahimo.

* * *

Gidayeg nako si Cebu City Councilor Jerry Guardo kay aktibo kaayo siya sa pagpangguba sa kabalayan nga anaa sa three-meter easement sa kasapaan.

Ang nindot sab unta kon mo-counterpart kaniya si Konsehal Junjun Osmeña nga mangguba sab sa mga estraktura nga milapas na sa aseras ug daplin sa karsada.

Nasugdan na man ni Konsehal Junjun ang pagpangguba sa mga balay ug tindahan nga milapas sa aseras sa V. Rama Avenue, ug iya kunong himoon sa uban dapit sa dakbayan, apan wa pa man.

Kanindot kon ang tanang konsehal ingon kang Guardo nga motrabaho gyud. Dili hinoon kita makapugos sa uban kon dili sila motrabaho og ingon niini kay ang ilang katungdanan ang pagka magbabalaod man.

Nabasahan nako sa balita nga ang ubang naa sa tampi sa kasapaan magpabayad kuno sa dili pa gub-on ang ilang kabalayan.

Pwede tingali kon ang tibuok balay gyud ang maguba, apan kon kabahin lang sa balay, uy, nganong bayaran man sila nga anaa ra man gihapon ang ilang balay.

Sama niining kabalayan nga anaa daplin sa Parian Creek, unya sa Lahing-lahing Creek, sus gawas nga gipagamay nila ang sapa, ang ilang mga banggera anaa na gyud sa sapa.

Angay na gyud nga ipakita sa administrasyon ni Mayor Michael Rama ang political will alang sa kaayohan sa kinabag-ang katawhan.