Kaaway na ang PhilHealth

Daghang mga pribadong hospital sa Metro Manila ug mga kanait nga probinsiya nga sakop sa Private Hospitals Association of the Philippines, Inc., ang naglaraw nga dili na mobag-o sa ilang accreditation sa PhilHealth tungod sa padayong kapakyas niini sa pagbayad sa ilang mga reimbursement claims.  Dugang na usab kini nga kaulawan sa PhilHealth kinsa misaliring sa P15 bilyones nga anomaliya dili pa lang dugay.  Ang relasyon karon sa PhilHealth ug sa mga hospital gihulagway sa panultihon nga, “Kon gamay ra imong utang, tawgon ka lang nga Mangungutang; apan kon dako na ang imong utang, tawgon ka na’g Kaaway”.  Saoonz!

Mas dako’g budget

Nanawagan ang DILG sa mga kagamhanang lokal nga hatagan og prayoridad ang mga proyektong patubig labi na sa mga lagyo nga kumonidad isip kabahin sa devolution transition plans sa pagpatuman na unya sunod tuig sa Mandanas Ruling nga giluwatan sa Korte Suprema.  Angayan hingusgan sa DILG ang maong panawagan kay, tungod sa kadiyotay sa botante ning maong mga lugara, kanunay kini hikalimtan ug yam-iran sa mga nangatungdanan.  Panahom pa sa akong higala, “mas dako pa’g purohan gahinan og budget sa gobyerno ang sementeryo, kay sa kabukiran”.  Pagkatoytoy!

Kaluha nga kinaiya

Libkason na sa DOTr ang kamandoan pagbutang og plastic dividers nga mag-uwang unta sa mga pasahero sa mga publikong sakyanan.  Giangkon sa DOTr nga walay igong siyentipiko ug medikal nga basehan isip panagang sa coronavirus ang pagbutang og divider.  Gibatokan na sa publiko ang maong polisiya pagsugod pa lang pagpatuman niini. Gipamatud-an lang sa DOTr ang panultihon nga ang “Kaluha ang pagka-Gahi’g-ulo ug ang pagka-Hanggaw”.  Tinuod usab ang panultihon nga “Daghan ang mahimo sa tawo tungod sa iyang ka-gahig-ulo kay sa kawsa alang sa nasud o relihiyon”.  Hala no!

Climate change part 1

Matud pa ni Foreign Affairs Secretary Locsin, Jr., ang climate change usa ka mabugnaw nga kamatuoran ug dili angayan mag-agad lamang sa panahom ug opinyon ni bisan kinsa.  Dugang pa sa kalihim nga sukwahi sa nangagi’ng climate change nga atong mapasangil sa mga natural nga hinungdan, ang kausaban sa klima ni’ng kabag-ohan naggumikan sa pagpasagad sa katawhan. Husto si Secretary Locsin.  Angayan batokan ang climate change sa tinud-anay og may tinguha nga modaug.  Dili pagasabton nga kay gitugnaw ka kagabii, nahanaw na ang global warming.  Madahaan!

Climate change part 2

Magkinahanglan ang kagamhanan ug P330 bilyones kon ipadayon niini ang laraw pag-“buy out” sa mga coal power plants sa Mindanao isip kabahin sa atong commitment pagkunhod sa carbon emission.  Gisupak hinuon sa DOE ang maong laraw tungod sa kamahinungdanon sa maong planta sa kuryente sa kalamboan sa Mindanao.  Dili ikalimod nga sa hisgutanan sa global warming, dako’g tampo ang mga adunahan’g nasud sa hinungdan sa kadaot sa kinaiyahan.  Ang nakaparat kay ang una ug labaw’ng nga maapektohan ni’ng pagkagubâ sa kinaiyahan mao kadtong mga pobreng kanasuran.  Kadakong baligho!