Pinoy sa India ililikas,‘wag isama ang virus
Tumitindi ang kaso ng COVID-19 sa India. Nakita natin sa mga larawan at video ang dami ng mga namamatay na ang mga bangkay ay sinusunog na lang sa mismong mga lansangan.
Ang dilemma ngayon ay kung papaano ililikas ang libu-libong mga Pilipinong naninirahan sa India. Hindi naman sila puwedeng pabayaan na lang doon at maisama sa mga mamamatay dahil sa karamdaman.
Ngunit kung sila ay pababalikin sa Pilipinas, malamang ay dalhin nila ang bagong mas nakamamatay na variant ng sakit at ikalat sa ating bansa. Mas mahirap naman kung ang Pilipinas ay sasalantain ng nakamamatay na virus at makatulad tayo ng India. Ngunit kung ang balak ay ilipat lang sila sa mga bansang hindi masyadong laganap ang sakit, mayroon kayang bansang tatanggap sa kanila?
Iyan ang bagay na palaisipan sa Inter-Agency Task Force (IATF) na sa ngayo’y bumubuo na ng plano ng evacuation sa mga kababayan nating Pilipino na naninirahan sa nasabing bansa. May ilan nang Pilipinong iniulat na dinapuan na rin ng sakit sa naturang bansa.
Sa ngayon, nagpatupad na ng travel ban ang Pilipinas sa India at mga karatig na bansa nito tulad ng Pakistan at Bangladesh, Nepal at Sri Lanka. Hanggang May 14 ang travel ban na ito. Sa palagay ko dapat pa itong palawigin dahil kung hindi, nanganganib ang bansa na mapasukan ng higit na mapanganib na virus.
Nagsisimula na namang humupa ang kaso ng COVID sa bansa at baka magbalik na naman tayo sa square one kung hindi tayo gagawa ng ibayong pag-iingat.
- Latest