Gym dili sab makompiyansahan

Naglisod na gyod ang kahimtang sa tawo karon. Bisan ang mga simbahan nga napuno sa kasagrado, wala na girespeto.

Bisag giguwardiyahag mga imaheng santos, sudlon ug lungkabon gihapon sa mga kawatan.

Hasta mga mahalong gym, diin ang makasulod mao ra ang mga desenting miyembro, dili na usab masaligan human may pipila kanila ang nawad-ag mahalong butang nga gibutang sulod sa ilang locker. May guwardiya baya ang maong mga gym. Adunay CCTV. Pero makalibog. Nganong dili masubay bisan ang anino man lang sa nanghilabot?

May usa ka batan-ong lalaki (ngalan gipugngan), kinsa nahimong biktima tungod sa sobrang salig nga iyang gipakita sa maong modernong gym nga anaa mahimutang sa downtown area.

Sanglit dugay na siyang tig sudlanan dinhi isip miyembro, iya nang naandan ang pagsulod sa mga personal niyang butang didto sa iyang locker. Wala na siya magtiner og kaugalingong kandado. Kay sukad masukad, wala man siya mawad-i. Sa laktod, misalig siyag maayo sa kapasidad sa seguridad nga naobserbaran niya sa maong gym.

Apan sa miaging Marso 9, Martes, huma’g ehersisyo, dihang kuhaon na unta iyang sininang ilisan sulod sa locker, nahibulong siya nganong nagkayamukat ang hitsura sa hinapnig niyang mga igsusul-ob? Nabuliskad mga bolsa sa iyang karsones ug wala na diha ang P22,800 niyang selpon.

Maayo kay pitaka niya nahabilin sa iyang sakyanan. Busa, wala maapil. Pero sakit gihapon kaayo iyang ulo. Tanang importanteng numero sa transaksiyong personal ug sa iyang trabahoan atua didto. Sa kadaghan, unsaon sa paghinumdom-balik sa tanan?

Nangayo siya’g tabang sa tagdumala sa gym. Mihangyo nga ipasusi sa nagbantayng CCTV sa maong dapit ang talan-awong nahisulod sa oras sa pagkahitabo aron makita ang tinuorayng senariyo ug masayran kinsay nanghilabot?

Nanghuyhoy ang mga abaga sa batan-on dihang igo ra siyang gitubag sa tagdumala, nga wala nila kini marekord. Busa, wala silay tan-awon.

Pastilan, unsa man diay gamit sa ilang CCTV? Pang-adorno lang? Hinuon, gipablater na kini sa batan-on. Usab, gipa-blocked na ang kinatibuk-ang kagamitan sa nahisgotang selpon. Buwahan, dili na mapuslan.

Nakaani siya’g leksiyon sa maong hitabo. Ning panahon sa kalisod, ingon sa wala nay dapit nga wala masudlig kawatan. Desenting lugar?

Desenting pamarog? Mas kuyaw! Busa, dili na siya mokompiyansa!