Riding in tandem batok krimen

Sa nagkaduol nga Pasko duna na usay panghitabo nga seguradong mamugna sa mga tawo nga maghuwat lang og higayon nga makapamiktima. Sila ang mga kawatan.

Sumala ni Police Col. Josefino Ligan, Director sa Cebu City Police Office CCPO nga nag-una ang theft o kawat sa 8-focused crimes sa dakbayan.

Apil niini ang budolbudol, salisi ug uban pa nga binuhatan sa mga kiriwan og kamot nga nagpahipi lang samtang naghuwat nga makapamiktima.

Gani pipila ka semana ang nakalabay dunay nabiktima sulod sa usa ka dakong mall diin ang babayeng customer gitabangan og lipat sa upat ka babaye ug usa ka lalaki nga nagpakarong-ingnon nga mga customer usab.

Sila ang mga miyembro sa Salisi gang nga gibansay sa pagpangawat ug ang uban gikan pa sa ubang dapit.

Naa usay panghitabo sa pagpanulis, panghold-up ug uban pa nga krimen nga angayang matngonan sa mga tawo.

Subay niini nahimugso ang konsepto sa kapolisan nga riding in tandem tali sa CCPO ug sa Highway Patrol Group diin gipalig-on ang katakos nila sa pag gamit sa motor pag gukod ug pagsikop sa mga kriminal.

Sukwahi sa naandan nga riding in tandem nga nalambigit sa mga krimen, karon ang police riding in tandem mao ang mobatok sa mga kriminal aron seguradong masumpo sila.

Maayo kini nga programa nga nagkinahanglan og hugot nga suporta sa katawhan. Mag-unsa man ang mga otoridad kong walay magpakabana nga tawo sa pagtaho sa mga  nahitabong krimen, labaw sa tanan gikinahanglan nga mobarug ang mga mabiktima sa pagpasaka og kaso ugaling kini madakpan.

Nahumam namam ang Kalagkalag ug ang Pasko na ang gipaabot sa tanan busa amping lang gyud kanunay kay sa kalisod karon, pait kaayo ang dangatan kong mabiktima pa gyud sa mga kawatan.

Unta masustinehan ang programa sa CCPO ug HPG aron mangadakpan kining mga tampalasan nga kawatan.

Ang matag tawo sad dili nalang seguro magdala og mahalon nga butang kay makatintal kini sa mga tawong makasasala.

Ang mga alahas karon kutob nalang gyud unta sa deposit box kay magnet kini sa uban.

Maayo unta kong mahitabo ang kawat naatol nga naay riding in tandem kay madakpan apan kasagaran wala ra ba, matabla gyud hinuon.

Sa mga kawatan nga mamiktima naghuwat ninyo ang huot kaayo nga mga selda sa mga bilanggo-an.