Katungod sa pagpadayag

Ang pagpadayag usa sa mga tawhanong katungod nga giprotehian sa atong Batakang Balaud.

Ang gobyerno pinaagi sa mga opisyal niini maoy gitahasan pagpatuman niini ug sa pagsiguro nga ang maong katungod dili mayatakan.

Ubos sa landong sa demokrasya, responsibilidad sa matag-usa ang pagbantay ug pagsaway sa atong gobyerno ug sa mga opisyal niini kun sa atong tan-aw dunay mga kakuwangan o ba kaha kahiwian.

Ang matag-usa dunay lainlaing paagi sa pagpadayag gamit ang iyang mga nakat-onan.

Usa niini mao ang gitawag sa "English Literature" og  "satire" kon ang paggamit sa mga pulong nga gitumong sa pagyubit, pagbugalbugal, pagbiay-biay o ba kaha pagpanaway sa usa ka isyu.

Sagad nga gamiton ang "satire" diha sa mga pasundayag sa tiatro. Busa alang sa usa ka award-winning film writer nga sama ni Maria Victoria "Bambi" Beltran dili ikatingala nga ang pagpadayag sa iyang huna-huna sa labing init nga hisgutanan sa katilingban karon gipaagi og "satire".

Sa iyang post diha sa Facebook diin matud niya dunay kapin sa 9 mil ka kaso sa COVID sulod lang sa usa ka adlaw diha sa Sitio Zapatera, Barangay Luz ug nga ang dakbayan sa Sugbo mao nay "epicenter of the universe," tataw nga gitumong ni pagbugalbugal sa paghunong sa Department of Health sa "mass testing" ug pagdeklarar nga giisip na nila ang tibuok sitio nga "infected."

Ang maong post nakadapit sa pagtagad ni Mayor Edgardo Labella kinsa dali sab nga mi post sa Facebook uban ang hulga sa pagpapriso ni Beltran tungod sa matud pa pagpakatap og "fake news".

Ang bahad natinuod dihang niadtong Domingo sa kadlawon gidakop si Beltran sa kapolisan tungod sa matud pa kalapasan sa Bayanihan Heal as One Act nga bag-o lang napasar.

Dili ko motuo nga wala makasabot ang mayor sa kalainan sa "fake news" ug "satire".

Apan nganong gidaginot ni Labella ang usa ka "satirical post" taliwa sa lapad nga problema sa dakbayan nga mas naghatag og piligro sa katawhan nga mataptan sa COVID?

Pananglitan hangtud kagahapon, basi sa mga hulagway nga nakuha ni Romeo Marantal, wala magkadimao ang pagpatuman sa "social distancing" didto sa Carbon Market.

Dugay sab kaayo niyang napabalhin sa isolation facility ang mga positibo sa COVID didto sa Barrio Luz.

Mismo ang iyang bise mayor nga si Mike Rama misaway na sa kakuwang ug kalangan sa iyang administrasyon pagtubag sa problema. Ang pagpanggukod sa mga kritiko usa sa mga timailhan nga bangkaruta ang usa ka lider sa mga pamaagi unsaon pagsulbad ang krisis nga iyang giatubang.

Busa sa dili pa motuo ang kadaghanan nga kuwang siya sa hibangkaagan, angayang i-review sa mayor ang iyang prioridad taliwala niining padayong pagsaka sa mga kaso sa COVID dinhi sa atong dakbayan.