EDITORYAL - Tumanon bisan sayop

Kung tinuod ang bahad sa kadagkoan sa Police Regional Office-7 nga may posibilidad nga maapil sa imbestigahon ang mga sakop tungod sa mga kahiwiang gihimo sa ilang hepe, ubay-ubay kanila ang posible sab makasohan og “insubordination.”

Sa nahitabong kontrobersiya sa hepe sa Argao Police Station nga si Police Major Ildefonso Miranda Jr. hayan daghang mga sakop niini ang makasohan tungod sa wala nila pagbuhat sa ilang trabaho isip mga polis pagbadlong sa kahiwian.

Nagpasabot ba gyud nga bisan kinsang polis kun ang ilang hepe kun magbinuang ilang badlungon, dili kaha sila maoy initan ug makasohan?

Si Miranda gidakop diha mismo sud sa iyang buhatan tungod sa pagpagawas sa babayeng inmates ug ang usa gialegar nga iyahang gihimong kapuyo diha sa police station. Atol sa pagdakop, naabtan gyud ang 23-anyos nga babayeng inmate diha sud sa iyang lawak sa presinto.

Base sa iyang pamahayag sa mga interbyu sa media, niadto pa gyung miaging tuig nagsugod ang ilang relasyon.  Sa ato pa, dugaydugay na gyud nagbuhat niini ang maong hepe apan ang iyang mga sakop nagpakabuta bungol ang kadaghanan? Dugaydugay na silang nagpagamit sa ilang hepe bisan sayod silang supak kadto sa balaod.

Basin og naglibog ang mga sakop ni Miranda bahin sa panultihon sa uniformed service nga “obey first before you complain.”

Apan sakto bang sundon ang mando bisan og supak sa balaod? Nahadlok silang banggaon ang ilang hepe?

Aning mga sitwasyona unta, isip mga propesyonal nga mga miyembro sa PNP, bisan og ubos og ranggo kun ang ilang labaw klaro kaayong nagbuhat og supak sa balaod ilaha dayon unta kining gisumbong.

Apan ang nahitabo, tungod kay wala man sila mopalag bisan supak sa ilang kasingkasing, aw naanad ang ilang hepe hangtud nga naabot na hinuon sa eskandalo. Makaingon sab ta nga sayop kini sa mga sakop sa hepe maong husto gyud nga kinahanglan apilon sila sa imbestigahon.