Hagit sa katakos

Dakong sagpa sa katakos sa kapolisan dinhi sa Sugbo ang nahitabong pagpatay kang Mayor David Navarro sa lungsod sa Clarin, Misamis Occidental niadtong Biyernes sa hapon.

Diha mismo atubangan sa mga polis nga nag-escort niya paingon sa piskaliya gipatay si Navarro sa wala pa mailhing mga mamumuno.

Padulong unta siya pasakaan og kaso human sa iyang pagkasikop tungod sa pagpanagmal ug pagbinastos sa duha ka mga masahista niadtong Miyerkules sa gabii.

Ang wala mailhing mga armadong lalaki nga luwan sa usa ka van, miatang sa patrol car nga gisakyan ni Navarro ug mibunlot niya dayon pusil sa makadaghang higayon. Yanong misibat ang mga mamumuno human sa pagpamusil nga wa gyuy nahimo ang mga polis.

Dakong tanghaga kinsa ang mga armadong lalaki ug unsay ilang motibo?  Nganong ingon adto sila ka kursonada bisan atubangan sa mga polis?

Hagit ni sa katakos sa kapolisan pagsulbad sa maong krimin.

* * *

Usa sa mga mitumaw nga posibling motibo mao ang giingon nga iyang kalambigitan sa drugas. Si Navarro apil sa listahan ni Presidente Rodrigo Duterte sa mga mayor nga giingong nalambigit sa drugas.

Duha ka higayon siyang ginganlan sa presidente—una niadtong 2016 ug karong 2019.

Ang sipyat ni Navarro mao nga nagmugna siya og kontrobersiya dinhi sa Sugbo.

Ang ubang mga gilambigit ni Duterte sa drugas nanago ug wala na igkita tungod sa kabalaka sa ilang siguridad apan siya mihimo hinuon og kontrobersiya hinungdan nga sayon ra siyang natultulan sa mga nagtinguha pagpatay niya.

* * *

Laing posibling motibo mao ang gidudahang kalambigitan niya sa mga tulis.

Sigun sa intelligence report sa kapolisan didto sa National Capital Region Police Office (NCRPO), ang mayor giingong lider sa robbery gang gikan sa Ozamiz.

Siya, matud pa, si alyas Dante Navarro nga maoy lider sa Alferez Robbery Gang nga responsable pagpanulis og mga bangko didto sa Metro Manila ug bisan na dinhi sa Sugbo.

Giila pud siya nga lider sa Martilyo Gang nga dunay modus pagpanulis sama sa nahitabo sa J Centre Mall niadtong miaging semana.

Apan dili na makatubag ang mayor sa maong pasangil. Kun tinuod nga nalambigit siya sa mga pagpanulis ug wanted siya didto sa kaulohan, nganong nakalusot iyang kandidatura ug midaog isip mayor sa ilang lungsod sa miaging eleksiyon nga wala makabantay ang mga awtoridad?