Daghan gihapong walay kasilyas

Tanang tawo, kabos man o dato, gutomon gayod. Busa, inig kutoy sa iyang tiyan, kinahanglan nga sudlan niya kinig pagkaon nga makapuno sa kahaw-ang ug moinom og tubig inig ka human.

Kutob sa unsay gisulod sa tiyan nga pagkaon ug ilimnon moagi gyod kini sa atong digestive system, diin mahimo nang human wastes nga mogawas pag-abot sa tukmang panahon, nga dapat adto gyod unta ilabay sa kasilyas. Apan subo palandungon, nga ang lugar, diin didto mapalgi sa miaging Martes sa buntag, Abril 23, ang patayng lawas sa usa ka bayot, Raymond Mabini alyas Rica Reyes, LGBT member, usa ka pangpang sa kabugangan nga maoy gihimo sa mga residente (hinuon di tanan) nga kasilyas sa ilang komunidad.

Segun pa sa pamahayag sa hepe sa Mabolo Police Station, Police Major Dindo Alaras, nga migawas na ang resulta sa patayng lawas ni Mabini ug nasuta nila nga ataki sa kasingkasing ang hinungdan sa kamatayon niini ug wala silay nakitang foul play. Busa, gikonsiderar na nilang serado na ang maong kaso.

Base sa ilang pangagpas nga mipungko na si Mabini didto sa itaas nga bahin, diin sa iyang pag-utong maoy pagsulong sa ataki sa kasingkasing, nahulog paingon sa ubos ug napantok ang ulo sa gahing butang o bato hinungdan sa mga samad ug garas nga naangkon.

Kining maong hitabo, nagpahinumdom lang nga dinhi sa lalawigan sa Sugbo, labi na sa mga pobreng lungsod ug barangay, daghan gihapong panimalay ang walay kasilyas nga magamit oras sa panginahanglan.

Mao nga bisag udtong tutok, may lumolupyo nga magpasalipod na lang sa sinaog nga sakayan, mopungko ug moutong taman sa ginhawa hangtod mahuwasan.

Ang uban nga layo sa baybayon, adto intawon paingon sa kawayanan o kalibonan, diin kon dili makadalag pakaw o bunot, mga dahon sa tanom na lay gamiton sa pangpahid.

Wala pa ko moeskuyla hangtod nangapo na lang, kining dakong suliran sa kasilyas, wala gyod masulbad. Sa kadaghang Kongresista ug Senador nga nangagi, wala gyoy naluoy.

Hapit na moabot ang balota sa paghukom. Kon kinsang kandidatoha ang may kasingkasing sa pagpanday unya og balaod alang sa kasulbaran ning maong suliran, segurado gyod nga dili siya kalimtan ning umaabot piniliay.