EDITORYAL - Mga turistang kagaw

Hangtud kanus-a kaha magbaton og maayong pamatasan ang mga turistang modayo diha sa isla sa Bantayan? Hangtud kanus-a kaha sila makat-on nga dili basurahan ang baybayon nga ilang gisulong alang sa ilang personal nga katagbawan?

Dili man matawag nga pagbakasyon ang giadto aning mga tawo nga modayo sa Sta. Fe sa Bantayan Island kondili paghugaw-hugaw ug pagpakauwaw sa ilang kaugalingon.

Pipila lang kaha ka lugas kanila ang naghipos sa ilang mga biya nga basura ug nisulod niini sa ilang mga travelling bags aron adto ilabay ini og abot nila sa ilaha human sa ilang paglulinghayaw sa maanindot nga baybayon sa maong lungsod.

Seryoso na kaayo ang problema karon sa kalikopan tungod sa polusyon, dunay climate change, ug ang Pilipinas ikatulo sa tibuok kalibotan nga nag-una paglabay og basurang plastik diha sa kadagatan.

Bisan kinsa pay presidenteng ibutang sa Pilipinas kun ang mga tawo mga damak ug dili magpa-disiplina, usik lamang. Hilas pa kaayo ang uban nga moingon nga kun si Duterte na ang presidente wala nay hugawan, apan mao ra man gihapon.

Tungod ba kaha kuwang sab og implimentasyon ang mga otoridad sa mga balaod ug ordinansa? O ang mga tawo ra gyud ang gahi og ulo?

Kay kun ang turista may respeto palang sa balaod di na man tingali sila kinahanglang bantayan sa otoridad, dili ba? Dili na tingali sila kinahanglang balik-balikan og estorya nga ayaw kini buhata kay supak sa balaod.

Kaning mga klaseha sa mga turistang maghugawhugaw sa dapit nga ilang bisitahon walay laing pulong nga makahulagway kanila, sila mga damak ug kuwang sa disiplina.

Bisan og masuko pa sila nga tawgong ingon niini,  mga hipokrito ug hipokrita sila tungod kay  dili sila moangkong sila mga hugawan.

Unsa man diay angay itawag kanila nga wala namay laing paghulagway sa ilang binuhatan? Mga kagaw? Kagaw sila nga nagdala og sakit sa kinaiyahan.