EDITORYAL – Magubot ang Pilipinas

Gustong ipaaresto ug kon magmagahi ipapusil ni Presidente Duterte ang mga tawong mangilog mga yuta ug mga pabalay sa gobiyerno nga wa pa maokupar sa mga benepisaryo. Bahad kini tungod sa nahitabo sa Sagay City diin siyam ka mga tawo apil mga batan-on ang gimasaker sa wala pa mailhing mga tawo.

Ang pangulo mibahad niini sa mga walhong pundok tungod kay dako iyang pagtuo nga sila maoy nagsulsol sa mga biktima aron okupahon ang yuta nga bag-ohay pang giani sama sa nahitabo sa Sagay City sa Negros Occidental niadtong Okturbre 20.

Sumala pa nga kabahin sa gitawag nga Oplan Bungkalan at Okupasyon ang gihimo sa mga biktima nga gipaluyohan sa mga Komunista.

Tumong niini ang pugsanong pagpangilog sa mga kayutaan sa mga tinud-anay nga nanag-iya niini.

Sa nanglabay nga mga buwan may mga kabalayan nga gitukod sa National Housing Authority  alang unta sa mga polis ug sundalo didto sa Bulacan ang pugsanong gipuy-an sa mga sakop sa Kalipunan ng Damayang Mahihirap (Kadamay).

Samtang aduna say mga report nga gatosan na ka mga panimalay ang gihatag sa NHA ngadto sa mga miyembro sa Kadamay apan nahibaw-an nga ilaha lang kining gipaabangan sa laing tawo.

Dili makatarunganon ug dili makiangayon kining pamaagiha nga gamitong rason ang kakabus aron mangilog sa hinagoan sa uban.

Base sa balaod, dili obligado ang mga pribadong tawo nga nanagiya og mga lagpad nga luna aron papuy-on ang mga walay kapuy-an. Husto ang pagbahad ni Duterte kay pagsunod kini kon unsay legal.

Maunsa kaha ang Pilipinas kon si bisan kinsa mahimong mangilog og kabtangan sa uban.

Kaniadto pa dako ng hagit sa gobiyerno kining low-cost housing alang sa mga kabus ug hangtud karon wala pa gyud hingpit nga nasulbad ang problema maong daghan pa gihapon ang mga informal settlers.