Indikasyon sa kolor sa atuli (1)

Kabahin sa pag-atiman sa kaugalingon, atong kanunay gilimpyohan ang dalunggan pinaagi sa pagkulitog sa mga atuli, gamit ang ‘Q-tips’ o ‘ear buds’.

Ang wala mahibaloi sa kadaghanan, ang atuli adunay tahas sa pagprotehir sa dalunggan, ug nagbutyag usab kini og importanteng impormasyon mahitungod sa katibuk-ang kondisyon sa panglawas.

Busa kon mangatuli kita, ampingan dili matandog ang tambolero sa dalunggan (eardrum) basig mabuslot nga di na hinuon kita kaayo makadungog.

Unya, kon makita mo ang kolor sa imong atuli, makat-on kita sa pagsabot sa indikasyon niini.

Himoa nga giya kini’ng atong tukion karon - ang indikasyon sa kolor sa atong atuli, sama sa mga mosunod;

* Gray (abuhon) – kon ingon nga may pagka-abuhon (gray) ang kolor sa atuli, walay ikabalaka kay nagkahulugan lang kini nga dunay deposito sa abog ang ilawom sa dalunggan.

Sagad sa mga aduna niini kadtong nanimuyo sa siyudad kay taas ang lebel sa polusyon.

* Red (pulahon) – kon ang atuli mo adunay dugo nga pula, nagpasabot kini nga natandog o nabuslot ang tambolero (eardrum) sa dalunggan mo.

Niini angay mo dayon nga matagad problemaha kay moresulta kini sa impeksyons ug sa isyu sa panungog. Busa ayaw dugaya ipahiling kini sa espesyalista nga  EENT doktor.

* Brown (kapehon o tabunon) – dili kini komon nga kolor sa atuli, nga gikan sa naghinubra nga ‘fluid’ o lubrikante sa ‘eardrum’, natigum kini hangtud  nanguga.  Nagpasabot kini, nga ang atong lawas ug hunahuna, anaa sa dili maayong kondisyon kay napailawom kini kanunay sa grabe nga pagka-stress.

Sa ato pa, unsa may atong gipamatyag sa lawas, maapektahan gyud ang atong dalunggan.