Lumang jeepneys saan itatambak?
DAPAT nang i-phaseout ang jeepneys. Hindi na ito makakapasa sa modernong pamantayan ng sasakyang panlupa. Mausok, maingay, at mapanganib ang jeepneys. Reconditioned lang ang makinang diesel; walang noise muffling, at mali ang sakayan sa hulihan. Hindi uubra sa Euro-4 standards. Pinsala sa kalusugan, kalikasan, at kaligtasan.
Pero saan dadalhin ang jeepneys na hindi na nirerehistro dahil bagsak sa emission tests? Hindi ito puwedeng ibenta para pampribadong gamit. Kung mausok, maingay, at mapanganib sila bilang pampubliko, gay’un din kung pampamilya. Hindi rin maari i-cannibalize para pambangka ang motor. Sa dagat naman mag-iingay at magdudumi.
Ituring na dapat na junk ang jeepneys. Kakalasin ang mga parte nito para i-recycle. Ang mga bakal ay lulusawin para gawing ibang makina, reinforcement bars, at kagamitan. Ang mga piyesang plastic, kahoy, fiberglass, at salamin ay ihanap ng bagong paggagamitan. Maraming imbentor at kompanya na mangangailangan.
Hindi lang jeepneys kundi lahat ng kasalukuyang sasakyang panlupa ang malapit nang maging junk. Nauuso ang battery-powered vehicles. I-plug lang sa electrical outlet magdamag, tapos buong araw na aandar. Hindi na gagamit ng gasolina na nakakawasak ng kalikasan at kalusugan. Booster ng baterya ang solar panels at sariling momentum habang umaandar ang sasakyan.
Nag-anunsiyo na halos lahat ng pabrika ng sasakyan sa Europe na simula nitong 2018 karamiha’y hybrid -- gasolina, baterya, solar -- ang makina. Sa 2022-2025 lahat ay baterya at solar na. Malalaos na ang mga sasakyang nakikita sa kalye sa kasalukuyan.
Tiyak magbabago rin sa baterya’t solar ang America, Japan, Korea, at China. Kasabay nu’n huhusay ang mass transit at ride hailing (Grab, Uber, at iba pa) na de-baterya’t solar -- at wala nang driver. Ipagbabawal ng buong mundo ang mga mauusok, maiingay, mapanganib.
- Latest
