Gihimong gatasan ang DOT
Sa katapusan, nakahunahuna ra nga moluwat sa iyang katungdanan si Tourism Secretary Wanda Teo human sa kontrobersiya nga iyang gikalambigitan ug sa iyang mga igsuong magsisibya, ang popular nga Tulfo brothers.
Ni-resign, o gitaktak man siya sa katungdanan, dili na mahinungdanon alang nako. Ang importante nga dili na siya maoy tourism secretary. Kini tungod kay posibleng mas dako pa nga pundo sa gobiyerno ang masipong unya sa iyang pamilya.
Nagsugod ang kontrobersiya batok ni Teo human masakpi sa Commission on Audit ang P60 milyones nga advertisement contract sa DOT ug sa television program sa iyang mga igsuon nga sila si Ben ug Erwin Tulfo diha sa PTV-4, usa ka sibyaanan nga gipanag-iya sa gobiyerno.
Matud ni Teo, wala siya masayod nga ang kontrata tua diay sa iyang mga igsuon tungod kay ang iyang gikasabot mao ang management sa PTV-4. Apan kinsa’y iyang patuohon?
Kon ang PTV-4 maoy iyang gikasabot, nganong ang kompaniya nga gipanag-iya sa iyang mga igsuon maoy mitanyag nga iuli ang P60M nga bayad sa kontrata?
Dili malalis ang conflict of interest sa gihimo ni Teo, ug bisan kapila pa nila iuli ang kwarta nga nadawat sa iyang mga igsuon, dili na matuis ang kamatuoran nga dakong krimen sa pagpangurakot sa pundo sa gobiyerno ang iyang nahimo.
Gipahimuslan og maayo ni Teo ang iyang pwesto pinaagi sa paghatag og pabor sa iyang mga igsuon apil na sa iyang bana. Tiaw mo ba nga gitudlo man sab diay ang iyang bana nga si Roberto isip board member sa Tourism Infrastructure and Enterprise Zone Authority (TIEZA).
Gawas niini miyembro sab ang iyang bana sa tanang unom ka komitiba niini. Pagkahayahay, gihimo nilang gatasan ang gobiyerno. Karon nga wala na si Teo sa DOT, interesting kon unsa’y sunod nga buhaton sa iyang mga igsuong magsisibya?
Magpabilin kaha sila sa ilang pag-alleluia ni Presidente Rodrigo Duterte? O mahisama sila sa jukebox nga dili motingog og wa’y itingal nga sensiyo?
* * *
- Latest
