Dili angay’ng buhaton sa pagtanom og utanon

Ang ‘plantcaretoday.com’ mipaambit og kasayuran niadtong mga mahiligon sa pagtanom og utanon diha sa nataran, o sa mga biya nga sudlanan, susama sa gimisetas nga tanom.

Bisan pa man og bag-ohay, o dugay na kita sa pagpananom, dili gayud kalikayan nga makahimo ta og sayop mahitungod sa pag-alima sa tinanom, gumikan sa subra nga kahinangop nga kini kapahimuslan nato inig-abot sa panahon.

Busa ania ang pipila ka giya, nga mao ang dili gyud angay buhaton sa paggalam sa gipananom, kon buot nato makaseguro nga dili mausik ang atong kahago sa pagprodyus og organik ug abunda nga utanon.

*  Nanubra sa abuno (fertilizer): Maoy atong pagtuo nga makaayo ang pag-abuno, apan dili sab maayo nga patuyangan ang yuta sa abuno, kay may posibilidad nga ang yuta maasidik o mawala ang mga nutrens nga gikinahanglan, aron motubo ug molipang ang tanom.

Kon mogamit og abuno, basaha sa pakete ang pasidaan sa paggamit, ilabi na ang ‘dosage’ niini kay nakapatik sab niini ang ‘analysis’ sa komposisyon sa kemikals, aron paghaum sa yuta nga abunohan.

* Ang paggamit sa ‘synthetic  fertilizer’ – Ang hardenero, o mananomay, nga gusto og organik nga prodyus, dili gayud mogamit niini nga klase sa abuno, kay ang halos mga ingredients niini, mga sentetik nga kemikals.

Kon ugaling mopalit og giprosesong abuno (fertilizer), iseguro nga susihon ang komponents niini kon kini ba organik, kay ang sentetik nga abuno makahilo (toxic) sa yuta ug sa tawo nga mokonsumo sa tanom nga inabunohan niini.

Mas maayong moprodyus ka og inato nga abunong gikan sa pinadugtang mga sagbot, o mga hugaw sa tawo ug mananap (compost/manure), nga maoy ilahugay sa yuta.