Mga benepisyo sa mustasa

Usa sa makuha nga benepisyo sa mustasa (mustard), mao ang pagpalig-on sa atong metabolismo, nga ang mga selyula sa lawas pabaskogon ug hatagan kini og enerhiya. Pampaabtik usab kini aron iminten ang normal nga sirkulasyon.

Gawas niini, gikonsiderar sab ni nga makapaalibyo sa problema sa kasingkasing, ug sa nagping-ot nga baradong sinus, ug paghupay sa nanikig nga kaugatan.

Ang liso sa mustasa (mustard seeds), dunay tulo ka klase nga komon kaayo sama sa puti, dagtumon (brown) ug itom nga kolor.

Ang itom nga liso sa mustasa maoy mas isog nga halangon tagamtamon. Ang hilba (herb) niini, gigamit sab nga panglamas sa mga sud-an.

Kini’ng mustasa, lumad nga tanom nga kagikan sa Uropa ug Amerika.  Ang itom nga liso sa mustasa, sagad gikan kini sa Amerika, Canada, Britanya, Hungarya, Argentina, India, ug Pakistan. Ang mustasa, kaliwat kini sa pamilya’ng tanom nga ginganlan og ‘cruciferae’.

Mga hiyas sa pag-alibyo sa mustasa. Kini makapagana, antibakteryal, aprodisyak (pagana sa seks), singtanon (diaphoretic), pagpasuka (emetic) o pampurga gumikan sa toksik o nahiloan. Ang lana sa mustasa (mustard essential oil), nagbaton og ‘isothiocyanates’ nga pangontra sa kanser sama sa tinai ug kolon.

Pampagana kini sa sistema sa digestion, aron dali pug-on ang duga (digestive juice) nga pampahilis sa kinaon.

Gawas pa niini, ang kanunay nga pagkonsumo sa liso sa mustasa, mopamenos sa panakit sa ulo (migraines). Mopaalibyo sab sa sip-on, ubo ug hilanat (flu).

Pakalma sa rayuma (arthritis), hubak, paus-os sa hayblad, hasta sa pagpahimsog o pampatubo sa buhok, ug ang pag-alibyo sa ‘diabetic heart deseases, nga palig-onon ang depektoso nga arterya/kaugatan sa kasingkasing. (Sumpayan)