Butane maoy gibasol

Tukma lang ang gihimo sa atong kapolisan nga gipangronda ang mga namatigayon pinaagi sa pag-refill og LPG ngadto sa mga butane canister kay sagad kanila, migamit gihapon og mga tayaon nga mga lata ug nakahatag kini og peligro sa katawhan.

Apan, tan-aw nako, ang gipangronda sa mga polis mao ra man ang mga tindahan nga igo lang hatdan og mga refilled LPG, dili gayud ang mga tig-refill. Ngano man, wala mo’y inpormasyon kun asa kini mahimutang? Kun mao, hinay ang inyong intelligence network.

Ang tinuod, dunay mga tig-refill niining mga lata sa butane nga gisudlan og LPG, nga migamit gyud sila og mga bag-o nga canister. Apan usahay sab, modawat ra sila og mga tayaon gikan sa mga tindahan nga gisuplayan nila sa ilang produkto.

Anaa diha ang nakahatag og peligro. Maayo ra ba og kining mga tawhana nga namatigayon og butane canister nga gisudlan nila og LPG motabang sa mga nasunogan kun ang ilang produkto makamugna og sunog.

Didto sa Minglanilla kaniadtong Biyernes, kapin sa 500 ka butane cannister nga puno pa og LPG nasakmit sa mga polis, ingon man 105 ka baseyo na nga cannister. Nindot kaayo kini nga negosyo ang pag-refill og LPG sa mga butane cannister.

Daghan ang nakuwartahan niini ug mao nga ubay-ubay ang natental sa pagpang-refill, kanang gitawag nila og “tuwad-tuwad” kay ang butane cannister direkta ra nga isangga ngadto sa tangke sa LPG.

Aron paglikay sa mga sunog, likayi na gyud ninyo pagpalit ang mga butane cannisters, ilabi na ang mga tayaon kay nipis na kaayo ang lata niini ug peligro nga mohungaw, ug makamugna og sunog.

* * *

Gidala na gyud intawon sa Negros Oriental ang mga mananap nga gialimahan sa kagamhanan sa Dakbayan sa Sugbo sulod sa dugay’ng katuigan. Gipangutana ko ni City Veterinarian Alice Utlang kaniadtong Sabado kun moadto pa kuno ko sa Cebu City Zoo.

Ako dayon siyang gitubag nga dili. Ang rason mao nga sakitan ko nga magtan-aw sa mga mananap nga gipanag-iya na unta sa Dakbayan sa Sugbo apan, ipanghatag na hinoon nato sa lungsod sa Amlan.

Kun ang Amlan nga usa ka gamay’ng lungsod sa Negros Oriental makaatiman man gani sa pagmentinar og Zoo, ang Dakbayan sa Sugbo pa kaha? Dinhi, nakaingon ko nga nakahimo og dakong sayop si Mayor Tomas Osmeña.

Maayo na man lang unta kadto nga ang kabatan-onan nato makakita sa mga mananap nga wala pa nila makita sukad-masukad. Angay pa man gani unta nga dugangan ang mga mananap, ipanghatag na hinoon?