Promdi ang nanghawod!

Sa labing unang higayon sa kasaysayan, pulos mga taga probinsya ang nanghawod sa Bar examination diin ang “Top One,” produkto sa University of San Carlos (USC) nga si Karen Mae Calam.

Laing tulo niya ka kauban sa USC, nalakip usab sa Top 10. Sila mao si Fiona Cristy Lao, (3rd placer); Ann Margarette Momongan (7th placer); ug si Jefferson Gomez (8th placer). Human sa ilang oath-taking, magdala na sila og titulo nga attorney.

Diha nga ako silang nahinabi, daw dili pa sila makatuo sa kalampusan nga ilang naangkon. Pulos usab sila mapaubsanon (humble), wala’y hangin sa ulo, ug labaw sa tanan ang Ginoo gyud ang gibida nila sa ilang nakab-ot nga kalampusan.

Ang No. 1 topnotcher nga si Karen Mae Calam, lumad nga taga lungsod sa Kalilangan, Lalawigan sa Bukidnon, kinsa ‘proud’ kaayo sa iyang gigikanan. Gani gipasigarbo niya nga bisan og naggikan siya sa gamay ug wala kaayo mailhi nga dapit sa Mindanao, apan misibaw ang iyang pangalan pinaagi sa pagpaningkamot.

Ang iyang kalampusan gipahinungod niya sa iyang pamilya ug sa dapit diin siya nahimugso. Working student ug probinsyana man apan gipamatud-an sa No. 1 bar topnotcher nga dili mabintahaan ang naa sa probinsya nga maoy midominar sa pasulit nga giharian sa imperyalista nga mga tunghaan sa kaulohan.

Seguro sa kanhiay nga panahon, pakapin lang ang tan-aw sa uban sa mga probinsya, apan dili na nila puwede kaminusan ang katakus sa mga promdi, ilabi na gyud sa mga bisaya.

Ang presidente sa nasud Rodrigo Duterte, Senate President Koko Pimentel ug House Speaker Pantaleon Alvarez, pulos mga bisaya. Panahon na nga dawaton sa taga Manila nga ang tanan patas ra o adunay mas labaw pa kay kanila.

Ang kalampusan sa mga promdi bar topnotchers, kalampusan usab natong tanan nga mga probinsyano. Congratulations sa tanan nga mga bag-ong abogado!