Kinsa ang mabasol

Si Mayor Tomas Osmeña maoy gihan-okan og mga pagbasol kun ngano nga wala gyud kapugngi ang ilegal nga paghimo og sanitary landfill diha sa Barangay Binaliw, Dakbayan sa Sugbo.

Ang gibasehan ni Konsehal Joel Garganera sa iyang pagbasol kang Osmeña tungod kay napakyas ang mayor pagmugna dayon sa City Mining and Regulatory Board (CMRB) diha nga milingkod na kini sa katungdanan kaniadtong Hulyo sa miaging tuig.

Gimugna pagbalik sa mayor ang CMRB ug gitudlo si Konsehal Alvin Arcilla nga maoy pangulo niini kaniadto na lang miaging buwan. Apan ang ARN Builders dako na kaayo’g agi sa paghimo og sanitary landfill bisan og wala pa’y pagtugot sa balaod.

Utro pa kining kadagkoan sa Barangay Binaliw nga gipangulohan ni Kapitan Wilson Bacor ug ang mga opisyal sa Department of Environment and Natural Resources (DENR) nga nagmika ra sa ilang katungdanan.

Isip kapitan sa barangay, dako unta kaayo og mahimo si Bacor nga ipahunong ang ilegal nga paghimo og landfill diha sa iyang barangay. Nakalimot tingali kini si Bacor nga ang barangay usa usab ka Local Government Unit, ug siya maoy hawod.

Kamo sab diha sa DENR, nasayod gyud mo nga wala’y permiso ang paghimo sa maong landfill, nganong wa man mo’y gihimo aron pagpahunong sa ilegal nga kalihukan?

* * *

Nindot kining lakang sa Cebu City Council nga himoan nila og kausaban ang ordinansa nga nag-regulate sa operasyon sa mga buwangan dinhi sa dakbayan. Nabantayan man gud ni Konsehal Pastor Alcover Jr. nga wala man iklaro sa City Ordinance 1447 nga ang mga menor de edad did-an gyud sa pagpasulod sa mga buwangan, ilabi na kun sila moapil sa pagpanugal.

Laing nabantayan ni Alcover nga diha sa mga buwangan, gawas nga magpustaanay ang mga sugarol sa manok, duna sa’y laing sugal, sama sa hantak ug baraha. Dugay na kini nga kalihukan apan gipasagdan ra.

Karon, kun maaprobahan kining ordinansahon ni Alcover, ang manubag ug pahamtangan og multa mao ang mga tag-iya sa buwangan. Apan mag-unsa man ang P5,000 nga multa, gamay ra kaayo na. Mao ni ang kuwang sa kausaban nga gisugyot ni Alcover.

Ang mas nindot nga isugyot ni Alcover mao ang pagpasirado sa buwangan kun masakpan nga adunay ilegal nga sugal. Ang tumong niini aron nga magbantay gyud ang tag-iya nga wala’y laing ilegal nga sugal nga mapahigayon diha sulod sa iyang buwangan.

Puslan man nga mohimo kita og kausaban, estriktuhon na lang gyud pag-ayo. Ubos sa ordinansa, P5,000 ra ang labing dako nga multa nga mapahamtang.