Timbaya sa yawa!

Wala gyud intawon palabya sa demonyo ang kasagrado sa Statio Orbis sa 51st International Eucharistic Congress diin gisulayan sa paghugaw-hugaw ang kasagrado sa kalihokan diha sa San Pedro Calungsod Templete sa SRP kaniadtong Domingo.

"Welcome to Binay Country." Kini ang nakasulat sa tarpaulin nga gibutang sa Cebu Coastal Road pipila ka metro gikan sa templete nga maoy mosugat sa mga deboto nga mitambong sa kataposang misa          sa IEC.

Ang naasoy nga mga pulong mao ang mainiton nga pagtimbaya gikan sa yawa nga gustong bulingan ang kabalaan sa Statio Orbis nga gitambongan sa usa ka milyon ka tawo.

Karon nga miani og kasuko gikan sa mga tawo, wala nay moangkon kinsa ang responsable sa pagbutang sa mensahe. Kinsa man gyud ang nagbutang niadto?

Kun ingon niana na lang gyud sila ka baga og nawong ang kampo ni Binay nga wala nitagam dihang gi-booo sa mga tawo ang bise presidente atol sa Sinulog? Apan basin baya og ang kontra niya ang nagpasiugda niini aron dauton ang kampo ni Binay.

Si bisan kinsa man ang nagbutang sa naasoy nga tarpaulin, sila ang delegado gikan sa kangitngit nga misakay unta sa baga nga duot sa mga tawo. Apan napakyas sila sanglit dili naman madala sa lingla ang mga tawo nga gikunsaran sa tinuod nga presensya sa Ginoo.

Atangan na lang nato ang resulta sa gimando nga imbestigasyon ni Acting Mayor Edgardo Labella nga ilhon kun kinsa ang responsable kay atong sabligan og agua bendita.

Tan-awon nato kun dili ba moaso. Dili na seguro madutlan tungod sa ka baga sa ilang nawong!