Ayaw na ipamugos

Niining bag-ong tuig, aniay bag-o nga problema nga giatubang ang kagamhanan sa dakbayan sa Sugbo. Kini may kalabotan sa mga biktima sa dakong sunog nga miulbo sa Barangay Lahug sa niaging liwas sa Pasko.

Nagkapuliki karon ang City Hall pagpangita og relocation site alang sa mga biktima sa maong sunog sa dihang gusto nang bawion sa tag-iya sa maong luna, ang University of the Philippines-Cebu, ang maong lote.

Hagbay ra nga nagpuyo ang maong mga residente sa Sitio Avocado. Apan matud pa sa administrasyon sa UP, sulod sa pipila ka tuig, wala gayud nagbayad ang mga lumulopyo og abang sa yuta nga ilang giokupar. 

`Human sa pag-ulbo sa maong sunog, gusto nang bawion sa administrasyon sa UP ang maong luna. Kini aron kuno nga magamit kini alang sa dugang development ug expansion sa maong tunghaan. 

Apan miulbo ang tensiyon sa dihang mipursige ang mga nasunogan nga mobalik gayud pagpuyo sa maong luna. Tungod lagi kay wala pay klaro kun asa sila ibalhin sa kagamhanan sa dakbayan, wala silay laing opsiyon kondili ang pagbalik sa maong luna.

Karon makapaabot kita og dugang pang tensiyon kun moinsister gayud ang mga biktima sa sunog nga mobalik sa maong luna. Kini ilabi na kun mosakay na usab ang mga militante’ng grupo niining mao nga isyu.

Hinuon sa akong nakita, dili usab mamilok ang UP sa unsa mang lakang sa mga residente. Kini tungod kay sila maoy tag-iya sa maong luna. Ug nga buhaton gayud sa maong tulonghaan ang tanang legal nga lakang aron mabawi kini.

Apan luoy usab ang mga nabikitma sa sunog. Masulob-on gayud ang ilang pagselebrar sa Pasko ug Bag-ong Tuig. Dili ikalimod nga makasimpatiya usab kita kanila. Apan ang realidad mao nga dili gayud ila ang maong luna ug nga dakong tsansa nga dili na sila makabalik pagtukod sa ilang pinuy-anan.

Ug mao kini karon ang dakong problema sa kagamhanan sa dakbayan. Lisod na nga ipamugos nga makabalik pa ang mga biktima sa maong luna. Ug angay lamang nga dalion sa siyudad ang pag-relocate kanila aron nga mabalik na sila sa normal nga pamuyo.