Bagong Taon – Bagong Buhay?

A, Bagong Taon na kaya bagong buhay

Laging naririnig kapag dumaratal

Ganitong panahon at ganitong araw

Na ang lumang taon ating tinalikdan!

At nagbago na nga takbo ng panahon

Ang datihang ngayon isa nang kahapon

Ang oras ang araw matuling tumalon

Ang matandang taon naging bagong sanggol!

At ang taong 2015 naging taong 2016

Na inaasahang sa kanyang pagdating

Ay magbabago na hikahos na buhay natin

Nang marami mga kababayang giliw!

Nagbago na nga ba itong kalayaan

Nang marami nating mga kabataan

Sila ba’y wala na sa mga lansanga’t

Di na umiinom ng drogang kalaban?

Pero nagbago ba itong buhay natin?

Naging masagana ba ang mga bukirin?

Bakit ang istambay ay istambay pa rin

At lalong dumami ang walang gawain!

Anong pagbabago kaya ang nangyari

Gayong gumon pa rin sa bisyo si pare?

At ang mga ina’y tuloy sa ‘panggingge’

Nagsusugal pa rin babae’t lalaki!

Saka totoo bang sa mga pasyalan

Di na nakikita ang kabinataan?

Mga dalaginding at kadalagahan

Di na nagdi-date sa labas ng bahay?

Kung totoo ito’y ating masasabi

Na nagbago na nga buhay nang marami

At sa bagong taon ang s’yang naghari

Kabutihang asal – marangal na lahi!