Pamintaha ni Arroyo
Sa niaging tuig pa nga nidangop ang mga dumadapig ni kanhi presidente Gloria Arroyo sa international human rights lawyer nga si Amal Alamuddin, nga karon asawa na sa hollywood actor nga si George Clooney. Nilampos sila pagdani sa interes ni Amal nga nihapit gyod sa Pilipinas gikan sa iyang pakigpung sa Singapore aron sa paghimo og dugang pakisusi sa kahimtang ni Arroyo.
Human sa dul-an sa tuig nga pagpaabot, malipayong nangangkon ang mga abogado ni Arroyo nga nakahukom na si Amal pagpasaka og kaso atubangan sa United Nations Working Group on Arbitrary Detention (UNWGAD). Matud nila nakumbinser na si Amal nga nayatakan ang tawhanong katungod ni Arroyo sa padayong pagkatanggong bisan sa iyang kamasakiton.
* * *
Ambot may nakasulti bang Amal nga ang Sandiganbayan, di ang Malakanyang, maoy padayon nga nitanggong ni Arroyo. Gisalikway sa mga mahistrado ang iyang mga petisyon alang sa temporaryong kagawasan ni Arroyo kay nag-atubang siya og kasong plunder nga ubos sa mga balaod sa nasud di kapiyansahan.
Ambot may nakapasabot ba sang Amal nga di kapasanginlan si Presidente Noynoy Aquino nga maoy nagdiktar sa Sandiganbayan. Kansang kasagaran sa mga mahistrado tinudlo ra sab ni Arroyo. Gani, niulbo mang panagsungi tali nilang Aquino ug sa mga mahistrado tungod sa sunudsunod nga pagkapilde sa mga programa ug kamandoan ni Aquino sa Korte Suprema, apil na sa iyang gitukod nga Truth Commission ug sa gipasiugdahang Disbursement Acceleration Program.
* * *
Maayo hinuon kun makumbinser ni Amal ang UN sa pagsusi sa tinuod nga kahimtang ni Arroyo. Kay samtang padayong nipasangil ang mga dumadapig ni Arroyo nga biktima siya sa politikanhong pagpanggukod mas abunda ang mga sukaranan sa kinabag-an sa mga magbubuhis nga nahimangod sa padayon nga paghatag niya og special treatment.
Lahi sa mga kanhi pangu sa ubang kanasuran nga gipasanginlan og pangurakot ug pangabuso sa gahom, si Arroyo wa ibalhog og tinuod nga prisohan. Gipahimutang hinuon sa hospital arrest tungod sa iyang pangangkon sa bisan unsa na lang sakit. Tungod sa paggamit ni Arroyo kang Amal, mahimong kahatagan og higayon ang UN paglili sa managlahing balaod alang sa mga kabos ug adunahan sa atong nasud.
* * *
Kun tinuod ang pangangkon sa mga abogado ni Arroyo nga representahan siyang Amal, mapuno siya sa nagkataas nga listahan sa mga kliyente ni Amal nga gipasanginlan og dagkong krimen:
“ Abdullah al-Senussi, berdugo ni anhing Muammar Gaddafi sa Libya, kinsa gikiha og war crimes ug crimes against humanity atubangan sa International Criminal Court (ICC);
“ Yulia Tymoshenko, kanhi primero ministro sa Ukraine, nga mga kasong pagpangawkaw, pagpanuburno ug pagpatay; ug
“ Julian Assange, ang nagtukod sa Wikileaks, nga gipasanginlang nibisto sa sekretong mga dokumento sa mga embahada sa Estados Unidos sa nagkalainlaing kanasuran.
- Latest
