Balika mi Pope Francis

Sa mga activity nga gitambongan ni Pope Francis, dunay mga tawo nga gusto g’yud unta moduol sa Santo Papa  apan gibabagan sila sa kapolisan.

Angay lang usab nato kini nga sabton ug dili ikahiubos. Ang kapolisan gihatagan g’yud og kamandoan ni DILG Secretary Mar Roxas, isip maoy chairman sa National Police Commission, nga ayuhon ang pag-secure sa Papa.

Kun tugotan nato nga bisan kinsa na lang ang mga tawo nga makaduol kaniya, tingali puwerte’ng gubota kay ang tanang mga tawo gusto nga mahiduol sila ni Pope Francis ug makapakuha’g hulagway. Imbes kita masuko, angay pa gani nato nga daygon si Mar Roxas kay malampuson ang kapolisan ug ang ubang law enforcement units sa pagpanalipod ni Pope Francis sa iyang pagduaw dinhi sa Pilipinas.

Mag-ampo ta nga mobalik si Pope Francis ug moanhi na sa Sugbo.

* * *

Dunay kumentaryo si Kongresista Rodrigo “Bebot” Abellanosa kabahin sa “arrangement” sa mga dancing contingents nga mosalmot sa Sinulog Grand Parade.

Nakabantay man gud si Abellanosa nga hapit ang tanan nga contingents nga mosulod aron mosayaw sa Cebu City Sports Center inigtikyop na sa kagabhion maoy sagad modaug.

Bitaw, ang mga “out of town contingents” nga gikan sa laing mga dapit sa Kabisay-an ug Mindanao, apil na sa Masbate, mao g’yud nga bantayan kay anaa sa katapusan.

Husto ‘sab si Abellanosa sa iyang baruganan. Suporta ‘sab ko sa iyang sugyot nga i-raffle kun asa nga puwesto magsugod ang mga contingents.

Pagka karon gud, ang kadagkoan sa Sinulog Foundation Inc. mao ra ang magbuot kun asa nila pasugda pagsayaw ang mga contingents.

Kadtong mga out-of-town contingents anha g’yud nila pasugora sa P. del Rosario nga maoy “exit” sa Cebu City Sports Center.

Usa sa tumong niana mao nga ang nahisgotan nga mga contingents maoy makasayaw sa stage inigtikyop na sa kangitngit ug kun may mga suga sila, makita pag-ayo sa mga judges.

Ang argumento ni Abellanosa nga ang mga costumes sa mga Sinulog dancers mokidlap-kidlap kun mabanwagan sa suga sa Sports Center ug pinaagi niini, modayeg kanila ang judges.

May punto usab si Kongresista Abellanosa. Apan nakabantay ‘sab g’yud hinuon ko nga mga nindot ang presentasyon sa mga langyaw nga contingents.

Husto ang akong higala nga si City Engineer Jose Marie Poblete nga ang mga “out-of-town contingents” dili magpatuga-tuga og panulong kun bati ang ilang pasundayag.

Awhagon nato ang mga sakop sa Sinulog Foundation Inc. nga hisgotan nila ang argumento ni Abellanosa. Kun makita nila nga maayo, hala ipatuman sa sunod nga Sinulog Grand Parade.