Unsaon pagpilde si Binay?

Dako’ng pangutana ug bug-at ang gikinahanglan nga tubag. Ug ang tubag sa maong pangutana — wa’ pa motumaw ug wa’ pa mahibaw-i.

Kun basehan ang labing uwahi nga resulta sa presidential survey, si Bise Presidente Jejomar Binay gihapon ang paborito sa mga Pinoy labi na sa mga taga Metro Manila nga adunay labing dako’ng populasyon sa mga botante.

Base sa Novo Trends PH, sa 1,600 ka respondents nga gihimoan og survey, moabot sa 29.3% ang nipabor ni Binay. Daghan ang nagtuo’ng imposible ang resulta labi pa nga gilat-an na pag-ayo si Binay sa nagpadayong senate inquiry.

Apan bisan diay ang maong imbestigasyon ‘wala pay epek’ sa mga botante. Kun basehan ang sunod-sunod nga survey results makapabalaka nga basin ang senado mismo kwestyonable na ‘sab ang kredibilidad.

Matud pa, kun ganahan ka nga mapilde g’yud si Binay sa 2016, duha ka butang lang ang pwede’ng mahimo. Magpadagan og usa ka kandidato nga mas lig-on pa itandi ni Binay ug ang ikaduha mao ang pagpabilanggo kaniya.

Mapupos na lang ang tuig, wa’ pay lig-ong kandidato nga nitumaw nga mahimo’ng labing lig-ong kontra ni Binay ug posible’ng mohulga sa iyang performance sa survey.

Ang labing mahinungdanon siguro nga presko ang maong kandidato, wa’y mantsa ang pagkatawo, dili makuwestyon ang integridad ug labaw sa tanan adunay kahadlok sa kahitas-an ug adunay hingpit nga paghigugma sa katawhan pinaagi sa tinud-anay nga pagpangalagad.

Apan hangtod nga di’ pa motumaw ang pangalan ning maong kandidato, padayong magbarog si Binay sa labing taas nga puwesto kun ang mga survey ang hisgotan.

Milagro nga mabilanggo si Binay bisan pa kun unsa na kalapad ug kalawom ang mga akusasyon batok niya sa kurapsyon. Bisan sa lanog nga imbestigasyon sa senado nga padayong nagpakita sa buling ni Binay ug sa iyang pamilya, wala kini makatarug sa iyang tinguha nga modagan pagka presidente sa 2016.

Daghan man ang nisuka ni Binay ug sa iyang pagkatawo tungod sa wa’y undang nga mga akusasyon batok niya, apan dili ni igo aron hingpit nang maparot ang iyang tinguha nga mobanos sa labing taas nga posisyon sa gobiyerno.

Ug hangtud nga dili matubag ang duha ka solusyon aron dili siya makadaog (ang pagpadagan og mas lig-ong kandidato batok niya o ang pagpabilango) mahinayon ug mahinayon g’yud nga mahimo siya nga presidente sa nasud.

(Email: [email protected] or [email protected])