Lifestyle check alang sa mga opisyal sa NFA

Ang Senado mohimo og imbestigasyon sa hinungdan sa pagsaka sa presyo sa humay, ahos ug karneng baboy.

Nalipay ko sa gipahibalo sa Samahang Industriya ay Agrikultura (SINAG) ang committee on agriculture nga gipanguluhan ni Senador Cynthia Villar mosusi sa grabeng pagmahal sa presyo sa mga pagkaon.

Misamot akong kalipay nga usa sa susihon ang hilabihan kadako sa deperensiya sa presyo sa NFA rice ug commercial rice. Kining NFA rice gituyo kini sa pagpalit sa gobyerno gikan sa gawas sa nasud aron mahimong iparang sa commercial rice, sa ingon mahimong “stable” ang presyo ug dili momahal nga moabot og taga-liog ang presyo.

Gawas sa Senate inquiry, akong paninguhaon nga makaabot sa komitiba ni Villar ang akong gustong mahitabo sa mga opisyal sa National Food Authority nga nagpakadato lang sa ilang posisyon pinaagi sa ilang pakigkunsabo sa mga negosyante og bugas.

Ang gusto nakong mahitabo mao ang paghimo og lifestyle check sa mga opisyal sa NFA tungod sa balita nga atong nadawat nga adunay mga opisyal nga hilabihan na kadaghan og trak, luhong sakyanan ug adunay mga nindot nga balay bisan ang ilang suweldo dili paigo sa ilang pagpuyo.

Dili hinuon angay ikahadlok sa mga opisyal ug empleyado sa NFA ang lifestyle check. Kay kun wala sila’y tinagoan nga mga bahandi nga ilang nakuha atol sa ilang panerbisyo, ila kining pasagdan.

Kun atong nahimo kaniadto ang paglansang sa mga opisyal ug empleyado sa Bureau of Customs (BOC) nga adunay mga tinagoang bahandi ug nasakpan pinaagi sa lifestyle check, nganong dili man nato kini himuon sa ubang ahensiya sama sa NFA?

Hangtod karon adunay mga opisyal sa BOC ang gipaubos niining lifestyle check ug daghan na kanila (hangtod karon) nga gipasakaan og kaso sa korte.

Dinhi hinuon sa BOC-Cebu, adunay opisyal sa usa ka unit nga nagpabilin sa iyang puwesto bisan sa iyang lifestyle nga hilabihan kataas. Kining maong babaye nga opisyal na-dismiss na kini sa panahon ni kanhi Customs Commissioner Angelito Alvarez, apan nahibulong ko nganong imbes nanglimpyo ang administrasyon ni Aquino sa mga badlongon, gibutang man kini isip hepe sa usa ka sensitibo nga unit kung asa i-file ang import entry.

Kining bayhana gisagpa og dismissal sa iyang administrative case human mawala ang floating casino nga Philippine Dream tungod sa pag-isyu og clearance to sail sa Subport of Mactan. Kadtong barkoha gi-hold sa BOC ug Bureau of Internal Revenue tungod kay wala makabayad og duties and taxes ug internal revenue taxes, apan gipa-ikyas. Nagtuo ang mga awtoridad nga adunay nakakuwarta.

Ang mata sa publiko nakatutok sa BOC tungod sa pagtuo nga mao kini ang labing kurakot nga ahensiya.

Ang wala nato mahibaw-i nga adunay laing mga ahensiya sa gobyerno nga sama ra og dagway sa customs.

Kun pasagdan nato ang NFA nga makig-abin sa mga negosyante og bugas, ilabi na kining gitawag nila og rice cartel, kitang mga kunsomedor ang permanenteng alkanse kay kitay magbaguod sa kamahal sa bugas ug ubang pagkaon, samtang sila magbaguod pag-aswat sa ilang ginansiya.

Usa usab sa angay sulbaron sa administrasyon ni Aquino mao ang pag-estrikto sa buhis sa mga pagkaon nga pinalit gikan sa gawas sa nasud, samtang aduna pa gihapoy kurapsiyon.

Sa ato pa, magduble ang palas-unon sa negosyante – balayranan sa dakong buhis nga gi-estrikto ni BIR Commissioner Kim Henares ug ni Customs Commissioner John Sevilla ug ang “patong” sa mga opisyal – nga ipasa usab sa mga negosyante ngadto sa mga kunsomedor.

Kun ingon niini ang sitwasyon, dili mo-stabilize ang presyo sa humay ug ubang pagkaon. Magpabilin kitang mobayad sa presyo sa hilabihan ra kataas – presyo nga mahimo ra untang pakubsan kun ang administrasyon ni Aquino maghunahuna lang sa mga tawo.