Abiba ni Duterte
Nahadlok ko nga daghang niabiba ni Davao City Mayor Rodrigo Duterte sa iyang kusganon nga pasidaan atubangan sa mga senador nga iyang patyon si David Bangayan, ang iyang gipasanginlan nga pangu sa rice smuggling sa Pilipinas, kun masakpan nga magpayuhot na sab og bugas humay sa iyang dakbayan.
Apil sa mga nipakpak mao ang mga Sugbuanon nga nibilib sa talagsaong kaisog ni Duterte, nga napamatud-an na sa nagkalainlaing paagi sa daghan uyamot nga higayon, ug ang mga gipul-an na og pinaabot sa kanus-a mahipos sa sistema sa hustisya ang labing gikaintapan nga mga kriminal ug mga sindikato sa nasud.
* * *
Taga Davao mosulti nimo nga nilampos si Duterte sa pagbadlong sa mga durugista, mga tulisan ug ubang mga kriminal sa ilang dakbayan. Tungod sa iyang kaisog, gihulagway nga mas disiplinado ang taga Davao, way bisan usa nga magpabuto pagsugat sa Pasko ug Bag-ong Tuig ug wa nay mangahas pagpataka og labay sa ilang basura sa kadalanan.
Tungod sa kalamposan ni Duterte sa Davao nabanhaw ang mga awhag alang sa mas isog nga nasudnong liderato aron mas madisiplina ang katawhan. Nga mahimong maoy alas ni kanhi senador, karon Yolanda Rehabilitation Czar Panfilo Lacson kun mahinayon pagdagan sa 2016, o ni Duterte mismo kun matental sa nasudnong pamolitika.
* * *
Apan nasuwayan na ni sa atong nasud ug ang katawhan ang nahimong makaluluoy. Si anhing presidente Ferdinand Marcos nagtukod og diktadura ginamit ang slogan nga, “Sa Ikauunlad ng Bayan, Disiplina ang Kailangan.†Atong katiguwangan ganahang mohandom sa kahapsay sa unang mga adlaw sa pagpahamtang sa martial law--wa nay magtikaw-tikaw sa kadalanan inig bagting sa curfew ug gigukod ang tanang nagtago og mga armas.
Nahibawo tang tanan karon unsay tinuod nga nahitabo. Kasarangan nga katawhan ra ang gidisiplina. Ang mga nagtungkawo sa gahom way pupanagana nga nipaburot sa ilang bulsa pinaagi sa pagtilok sa nasudnong katigayonan ug nihipos ug niluba sa ilang mga kaatbang.
* * *
Di ang mga pasidaan lang ni Duterte ang tinuoray’ng gikahadlokan sa taga Davao, di lang sa mga kriminal kun dili apil na sa mga buotan. Kun dili ang vigilante groups sa Davao nga wa gihapo’y hunong sa pagpatay sa hapit tanang tawo o pundok nga iyang gipasidan-an. Kun tinuod nga may kalambigitan si Duterte sa death squad, wa siya’y kalainan sa mga kriminal nga iyang gigukod. Kay gawas nga gikumkom niyang balaod kinsa may paninglan kun may mga inosente nga ilang masaypan?
May sukaranan si Justice Secretary Leila de Lima nga mahasol sa labing uwahing pasidaan ni Duterte. Mas makaayo sa tanang hingtungdan kun palihukon ang National Bureau of Investigation (NBI) ug ubang mga ahensiya ubos sa iyang buhatan pagsusi nganong wa pa gyo’y nakabungkag sa vigilantes sa Davao.
* * *
- Latest
- Trending
