Ang Cordova ug ang kalibotan

Nailhan sa tibuok kalibotan ang Barangay Ibabao sa lungsod sa Cordova sa lalawigan sa Sugbo dili tungod sa mga maayong produkto niini, dili tungod sa pagka maayong laki niini sa larangan sa paugnat sa kusog, negosyo ug uban pang aspeto kun dili tungod sa makauuwaw nga cyberpornography ug cybersex nga gikalambigitan sa mga minor de edad o mga bata nga gitukmod usab sa ilang mga ginikanan sa pagsulod niini.

Tungod sa cyberpornography ug cybersex sa Barangay Ibabao, ang lungsod sa Cordova nahimo karong sentro sa tibuok kalibotan kun hisgotan ang mga bata nga nahimong biktima sa mga mahiligon sa pornograpiya.

Apan ina kay angkunon sa mga lokal nga opisyal sa nahisgotang lungsod ug lalawigan sa Sugbo ang makauuwaw nga suliran ilaha hinuon kining gipanghimakak ug giingong ila nang naalibyohan. Agi og pagpanalipod ilang giingon nga ang migawas nga balita sa pornograpiya sa lungsod dugay na ug wala na kini karon sa ilang lugar ug kun aduna man dili na kini kaayo daghan kun ikomparar sa kaniadto.

In fairness ngadto sa atong mga lokal nga opisyal sa lungsod sa Cordova ug lalawigan sa Sugbo ug ingon man sa atong kapolisan ug ubang law enforcement units, subsob usab ang ilang gihimong kampanya sa dihang nabulgar ang pornograpiya. Gani daghan na ang napasakaan  og kaso ug gisugdan na kini karon sa pagtaral sa hukmanan. Pero ang kamatuoran nagpabilin nga ang gamay nga Barangay sa Ibabao sa lungsod sa Cordova sa lalawigan sa Sugbo ug ang kinatibuk-ang nasud sa Pilipinas nahimong sikat sa tibuok kalibotan tungod sa cyberpornography ug cybersex.

Ang suliran sa pornograpiya dili nato mapalayo sa suliran sa kawad-on tungod kay aduna kini silay relasyon ug gani ang kawad-on mao man ang gihimong rason sa mga ginikanan sa pagtukmod sa ilang mga anak sa pag-apil sa pornograpiya.

Apan sa mga ginikanang tarong, ang kawad-on dili igong rason aron ibaligya ang ilang anak ug ilawog sa mga mananap nga mahiligon sa pornograpiya.