Langaw sa Kapitolyo
Kumbinsido ko sa kabuotan ug kamaayong tawo ni Gobernador Hilario Davide III. Apan nabalaka ko nga ang iyang kabuotan maoy mamahimong babag sa epektibo nga pangatungdanan.
Kini tungod kay karon pa lang gipahimuslan na sa pipila ka mga bulakbol nga mga kawani sa Kapitolyo ang iyang kaayo. Labi pa gyud kadtong mga kawani nga nagtuo nga dako og natampo sa kadaugan sa gobernador sa miaging eleksyon.
Nag-unang reklamo sa mga tarong nga kawani sa probinsiya mao ang giingon nga paghari-hari sa pipila ka mga ultimo mga empleyado sa Kapitolyo nga nagtuong gamhanan sila kay sa uban tungod kay nagpatuong suporter sila sa gobernador. Nagtuo ang maong mga kawani nga bisan unsay ilang buhaton sa Kapitolyo, molingiw ug palabyon lang sa pamunoan ni Davide tungod sa utang kabubut-on niini sa miaging eleksyon.
Makapanlimbawot sa balhibo giunsa pagbaboy sa usa niining maong mga alipores sa gobernador ang buhatan sa gobiyerno. Ang kopya sa video nga miabot kanako gikan sa nagpakabana nga mga kawani sa Kapitolyo nagpakita sa usa sa mga nangangko’ng alipores ni Davide nga wa nay laing gihimo gawas sa pag-atiman sa iyang tindahan sa empanada sulod sa buhatan sa PEACE, ang kahugpongan sa mga kawani sa probinsiya.
Wala na makauyon ang mga kauban niini nga kawani tungod kay inay atimanon ang iyang trabaho, ang iyang tinda naman hinuon maoy gibantayan didto sa kasikbit nga lawak sa buhatan diin siya madistino.
Way makaako pagbadlong sa maong kawani bisan ang iyang labaw tungod kay labihan niini ka puderoso. Mihulga pa ang maong kawani nga iyang uyogon ang mga regular nga empleyado sa Kapitolyo nga iyang gipasanginlang mga tawo sa kanhi administrasyon.
Gigamit sa maong kawani ang iya kunong kasuod sa gobernador aron panimaslan ang kanhi administrasyon tungod sa iyang kalagot nga gilabay siya sa isla atol sa pamunoan ni kanhi Gobernador Gwen Garcia. Ang pangutana, kinsa bay tarong nga gobernador nga ganahan og bulakbol nga empleyado? Angayang badlongon sa gobernador ang iyang mga supporters nga way kalainan sa langaw nga nagtuo nga sila kabaw tungod kay nagpatong sila sa bukobuko niini. Kini tungod kay ang maong mga kawani maoy makaguba sa maayong imahin nga gi-ampingan pag-ayo sa pamilya’ng Davide.
* * *
Usa sa mga nagsunod niining maong lindog nga si Gaudioso Rafols mipadangat sa iyang obserbasyon namong mga sakop sa media. Tugoti nga akong ipaambit ninyo ang unod sa iyang suwat:
Sir good am. ngano man ning pipila ka media ma-radyo, telebisyon og sa mga pamantalaan dili man ganado mopagawa sa isyu nga may labot sa kahiwi-ang buhat sa Visayas Ombudsman nga tataw man mohatag og kahigayonan pabor sa pipila ka badlungon nga Penro-Cenro Field Officials nga tataw usab nga nalambigit sa Technical Smuggling of Forest Products (Lumber og rattan poles inside the container van).
Basin kanimo mahatagan og kahigayonan nga mapagawas ning maong isyu basi sa inyong misyon sa katawhan aron mahibaw-an ang kamatuoran.
Daghang Salamat.
Alang ni Mr. Rafols, atong ipadangat ang imong obserbasyon ngadto sa mga opisyal sa Ombudsman. Sugod karong Agosto ato na’ng ikauban pagbalik sa kahanginan ang buhatan sa Ombudsman didto sa Lintunganay sa Radyo. Inyong madungog matag Biyernes, alas 10 hangtud sa alas 11 sa buntag sa dyLA.
* * *
- Latest
- Trending
