Wa matapos ang kalibutan

Disyembre 21, 2012, sa atong pagsuwat niini. Karon tong adlawa ang gitakda sa mga Mayan nga matapos ang kalibutan. Salamat nga pakyas na sad ang mga doom-sayer.

* * *

Samtang daghang mga matuhutuhuon nga mituo sa gipanagna sa Mayan calendar nga karong adlawa matapos na ang tanan, padayon ang gubat politika sa daghang dapit sa nasud. Sama sa kagubot nga gimugna ang politika diha sa Kapitolyo.

* * *

Giilogan og lingkuranan si Gob. Gwen Garcia kinsa anha na lang mag-opisina sa tugkaran sa Kapitolyo. Dili ta buot manghilabot niining kainit sa politika diha sa Kapitolyo kay basin mapaso ta.

* * *

Ug samtang nagpaabot ang pipila ka matuhutuohon sa giingong katapusan sa kalibutan, hapit gyud hinuon mahimong Miss Universe ang atong kandidata nga si Janine Tugonon. Napilde sa finale si Janine kontra sa Miss USA. Pero daghang nanan-aw sa pageant didto sa Las Vegas ang mi-boo sa desisyon sa mga hurado.

* * *

Thrilling kon kulba-hinam ang pagpadung ni Janine sa finale. Premiro nasud siya sa ika 16 nga pundok, sunod sa ikanapu, ug dayon sa top five diin mao nay gipilian sa makaangkon sa korona.

* * *

Diha sa iyang pagtubag sa pangutana sa hurado diin daghan ang mibilib sa atong manok ug miabiba hastang dili mga Pinoy sa audience. Hinaut unta nga dili na sad magdugay ang atong paghuwat sa sunod nga higayon sa atong pagsignit sa korona.

* * *

TRIVIA. Malipayong Pasko sa atong mga higala ug magbabasa diha sa Talisay ug Minglanilla. Daghang salamat sa inyong pagsuporta sa Banat News.