EDITORYAL - Comelec na-edukar na pagpabotar sa tanan

Murag na-edukar na ang taga Comelec sa paghimo og mga paagi aron ang mga tawong maglisud sa pagbotar tungod sa klase sa trabaho ug kahimtang sa panglawas, wa nay ikapangatarungan sa adlaw sa piniliay.

Kay daghan man gud nga mga Filipino nga di ganahan nga mobotar sa panahon sa piniliay kay di interesado sa mga kandidato nga nagpapili sa ilang lugar.

Sa laktod gumikan sa ilang pagpangluod ilabi na kun nakasinati sila og mga opisyal   sa lungsod, o kaha siyudad nga ilang gipuy-an   nga way maayong liderato, di na sila ganahan mobotar sa panahon sa election.

Murag nawad-an sila og kadasig sa pagsalmot sa mga gimbuhaton nga mahinungdanon kaayo sa komunidad ug sa atong nasud.

Maoy hinungdan nga gumikan sa trabaho nga di kabiyaan, ipasangil na lang niini ang ilang trabaho. Gumikan sa apan sa panglawas, himoon na lang usab kining hapin, o kaha gumikan kay senior citizen nga lakad-lakaran na lang sa mga batan-on ug di na respetohan, di na lang usab maningkamot nga makabotar,   busa   di na magpakabana kun maayo ba o di maayo ang mapili nga lider sa ilang lugar.

Kini tungod kay ang pagpili og maayong lider, di sayon, busa mao bitaw nga kinahanglang may election aron mahimong sukdanan kun unsay abilidad, talento, kinaiya sa magpapili, ug ang bugtong barahan ug panukdanan way lain kundi ang boto.

Kay ang boto maoy silbing salamin  nga motug-an sa kamatuoran sa matang sa tawo nga angay ibutang nga lider sa usa ka lugar.

Kay masabot nga kadtong labing daghan og boto, may abilidad ug hiyas siya nga labaw sa kaatbang niyang kandidato busa siya ang angayang ibutang sa katungdanan.

Mao bitaw nga ang usa ka kandidato nga magpapili isip lider, kinahanglang versatile siya nga di kumo kay abogado siya pulos na lang pamalaod ang iyang atimanon kundi kinahanglang kaantigo siya sa tanang butang nga mohatag og kaayohan sa iyang konstituwente.

Bisan abogado siya apan ipakita niyang maayong laki siya sa pagpalambo sa panginabuhi sa katawhan, maayo    usab siya moatiman sa panglawas sa mga tawo nga iyang gialagaran. May abilidad siya pagsil-ing nga hinlo ang iyang komunidad ug kaantigo siya mopatuman sa balaod bahin sa basura.

Gisuta niya kanunay nga desiplinado ang iyang mga tawo pinaagi sa pagpitol niadtong mga badlungon sa katilingban.

Karong panahona kaylap ug lapad na kaayo ang pagkasabwag sa gidiling drugas. Nag-ung-ong usab ang lihok sa mga rebelde nga buot moyabag sa hunahuna sa mga tawo aron pag-alsa batok sa goberno, sama sa gidiling drugas nga motudlo ug mogiya sa tawo aron mahimo siyang dautan.

Ang kandidato nga wa niining mga abilidara, di angay nga botohan sa adlaw sa election.