Ang gisuroy nga mga pirated DVD

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

 Nakahatag og kasayon sa mga tawo sa pagtan-aw og mga bag-ong salida sa pelikula nga gidala sa mga langyaw ug mga lokal nga mga artista ang mga Digital Video Desk (DvD) sanglit mahimo na man kining matan-aw sa sulod sa panimalay nga kauban ang tanang sakop sa pamilya ug wala na magkinahanglan sa pagsulod og mga sinehan.

Dako pa kaayo og bintaha ang pagtan-aw og salida sa mga DvD sanglit mahimo man kining balikbalikon sa pagtan-aw kun nindot ang gipasundayag nga pelikula.

Daghan ang nag-ingon nga matintal gayod sila sa pagpalit sa pirated nga mga DvD kay barato man kun itandi sa mga orihinal nga legal nga gibaligya sa mga tindahan.

Giapas nila sa pagpalit kay barato ug makadaginot sa magasto nga ang tulo ka buok nga mapalit lang P100 kay dako kaayo ang bintaha sa orihinal nga P500 ang matag buok ug labing ubos ang P200. Apan matud pa nila nga daghan usab hinuon ang bation og kalagot sa pirated nga mga DvD nga ilang gipalit kay usahay blangko man ug dili mosalida.

Gitataw nila nga adunay mga pirated nga DvD nga mosalida man tuod apan kun dili hanap, mag-untol-untol ang ipasundayag nga pelikula ug ang nakaparat pa gayod kay dili na mahimong ilisan kay gipalit man kini gikan sa wala hiilhing tawo nga nagsuroy lang sa kabalayan.

 Matud pa nila nga niining panahon nga nagkaduol ang mga adlaw sa sunod tuig nga piniliay maoy labing bantayanan ang mga politiko nga sama sa pirated nga DvD ang taras ug kinaiya.

Gipasabot nila nga ang maong matang sa politiko walay kalainan sa pirated nga DvD nga gawas nga hanap ang giluwatan nga mga pulong maoy ilang namatikdan nga mag-untol-untol ang huna-huna ug baroganan sanglit nag-agad man sa laing politiko nga nagtukmod sa iyang kandidatura nga ang tumong mao ang pagbungkag sa katawhang nagkahiusa sa kalamboan.