Isyu sa RH Bill may labot sa panghitabo?

Murag natinuod ang panglantaw ni Dr. Rene Bullicer nga matag higayon nga hisgotan sa kongreso ang RH Bill daghang katalagman ang masinatian sa nasud. Iya kining gibutyag   sa taga media atol sa lunop ug baha nga miigo sa Central Luzon ug Metro Manila niadtong milabay nga semana nga mipatay og ubay-ubay nga kinabuhi ug midaot og mga kabtangan, kahayopan ug kaumahan.

Gipasanginlan ni Dr.   Bullecer ang kongreso gumikan sa pagpanghingusog niini nga aprobahan ang RH Bill. 

Gikonklusyonan ni Dr. Bullecer nga di mosugot ang Dios nga mapasar ang RH Bill tungod kay nabalaka kini nga mokuyos ang   mga Filipino busa tataw nga apektado ang simbahan hangtod  sa mga negosyo wa nay mosuhot.

Kinsa pa bay manimba tuod kun dyutay na lang Filipino, kinsa pay mag-shopping sa mga mall, manakay og mga sakyanang pasaheroan, sama sa barko, eroplano, mga truck ug jeep pasaheroan, moeskuyla sa mga dagkong unibersidad , kun dyutay na lang ang mga tawo sa Pilipinas.

Unya matud pa niya nga kun pugson gayud sa goberno nga ipasar ang RH Bill daghang katalagman ang moabot sa nasud, ug wa tinuod magdugay nadisgrasya dayon sila si Sec. Jesse Robredo ug duha ka piloto.

Hinuon kun may mga lab-as pa lang unta nga mga pulong ang Dios karong panahona makabati unta kita kun   unsa gyuy anaa sa Iyang hunahuna.

Ang nagpabilin na lang gud karon mao na man lang  ang katumanan sa Iyang gipamulong nga dugay na Niyang gipapatik sa Biblia.

Pagmando Niya kaniadto nga magsanay ang tawo, sa unahan sa maong   Bersikulo ug Kapitolo   sa Biblia. Iya bayang gisulti nga kun daghan na “magpugong kamo”.

Hinuon ang Pilipinas karon dako pa kaayo og bakante nga bisan   usa ka bilyon ka tawo di pa makapuno niini.