Patay na ang hari – ang haring mabait
Kanyang kaharian bansa ng pag-ibig;
Diyos nang malungkot
ay Kanyang naisip –
Sunduin ang hari’t isama sa langit!
Namatay na hari’y Hari ng Komedya
At pati ng Diyos ay napatatawa;
Kaya sila ngayo’y laging magkasama
Sakay ng karwaheng
angels ang may hila!
Halos araw-araw sila’y namamasyal
Ang mga buntala laging minamasdan;
Ang daigdig nating maganda ang kulay
Ay alaga nila’t laging tinitingnan!
Rodolfo Vera Quizon ang ngalan ng hari
Siya ay marunong mabuting ugali
Siya’y matulungin walang inaapi
Nang kunin ng Diyos lumuha’y marami!
At dahil sa siya ay mabuting tao
Niloob ng Diyos na isama ito;
Ano’ng dapat gawin sa taong ganito
Na walang papalit sa sariling mundo?
Marahil kung hindi umalis si Dolphy
Diyos na marunong ay hindi rin happy;
Tumpak lang sigurong
sila’y magkatabi
Upang sa daigdig
magrendang mabuti!
Wala na nga siya sa ating daigdig
Kapiling ng Diyos na Hari ng Langit;
Ngayong dalwang hari’y laging magkadikit
Itong Pilipinas magiging tahimik!
At tayong naiwang alagad ng hari
Di dapat malungkot
huwag mamighati;
Alaala niya ay narito lagi
Sa puso’t isipan ng magkakalahi!
Wala nang iba pang papalit sa kanya
Sapagka’t si Dolphy napakadakila;
Ngayong wala siya’y lalong tamang-tama
National Artist Award sana’y ibigay na!
Ibigay at hindi’y masaya si Dolphy
Pagka’t kapiling siya ng Diyos na kay buti;
Ang mga biyaya saka luwalhati –
Sa kanya nang lahat – siya’y very happy!