Kapitanes gisulay

Kun ang presensiya sa mga kapitan atol sa dungan nga tigom nga gipatawag sa Team Rama ug sa Bando Osmeña Pundok Kauswagan niadtong Sabado maoy basihan posible nga modaog si Mayor Michael Rama batok ni Kongresista Tomas Osmeña sa eleksiyon sunod tuig.

Human masayod si Rama nga dunay luncheon meeting nga gipatawag si Osmeña niadtong Sabado dali sab nga mihimo ang mayor og pinirmahay sa memorandum of agreement ug kunohay paghatag og update sa mga kapitan sa mga hinabang nga madawat sa ilang barangay.

Resulta mas daghan sa mga kapitan ang mitambong sa tigom ni Rama kay sa ni Osmeña. Sigun sa talaan dunay 40 ka mga kapitan ug unom ang mipadala og representante didto sa tigom ni Rama samtang 30 lang ang didto ni Osmeña.

Matud sa BOPK daghan sa mga kapitan ang buot untang moadto sa ilang tigom apan nahadlok sa bahad ni Rama nga dili sila makadawat og hinabang gikan sa dakbayan.

Kun tinuod ang pasangil sa BOPK dili diay angayang ikalipay ni Rama ang gidaghanon sa mga kapitan nga midugok sa iyang tigom.

Kini tungod kay di siyang kasiguro kun loyal bang tinuod ang mga kapitan nga didto niya.

Sa pikas bahin mas makatulog nga maghayang si Osmeña tungod kay sigurado siya nga ang 30 nga didto niya lunod patay gyud nga tigpaluyo. Tiaw mo ba nga mitambong gyud sa tigom ni Osmeña bisan sa hulga nga mawagtangan sila og hinabang gikan sa dakbayan.

Mas lisud ang pagkabutang ni Rama tungod kay dili siya kasiguro kinsa sa mga kapitan nga didto sa iyang tigom ang nagpakaaron-ingnon lang.

Laing rason nga dili pa angayang malipay si Rama sa resulta sa iyang tigom tungod kay di garantiya ang gidaghanon sa mga kapitan aron magmadaugon sa eleksiyon.

Dinhi sa dakbayan sa Sugbo namatud-an na sa nanlabay nga mga piniliay nga maantigo ang mga butante ug dili lang basta basta nga mosunod sa ilang kapitan.

Ehemplo niini mao ang nahitabo niadto ni kanhi mayor Alvin Garcia. Dihang naguba sab ang relasyon ni Garcia ug Osmeña ug nagkakontra sila sa eleksiyon mas daghan ang kapitan nga didto ni Garcia. Gani kini maoy iyang gisaligan niadto nga mabuntog si Osmeña nga duna lay pipila ka pudyot nga kapitan niadtong higayona.

Apan wala mosaler ang gidaghanon sa kapitan ni Garcia tungod kay gipildi gihapon siya ni Osmeña.

Usa ra gyu’y angayang himuon ni Rama aron iyang mapildi si Osmeña ug kini mao ang pagpakita sa publiko nga mas maayong laki siya nga lider.

Kun unsaon nga iyang makumbinsir ang mayoriya sa mga molupyo sa dakbayan kana maoy angayan niyang tun-an.

Apan sigurado ko nga ang showbiz dili maoy tubag niini. Labi pang di tubag ang pagpahuwat sa mga beneficiaries sa mga programa sa dakbayan og tagpila ka oras aron lang maminaw sa iyang kanta sa dili pa niya personal nga itunol ang hinabang.

* * *

[email protected]