Legacy
Nakonbikto na ang 11 ka mga akusado pag-operate sa mega shabu laboratory didto sa Barangay Umapad sa dakbayan sa Mandaue.
Apil sa mga gikonbikto mao ang financier nga si Calvin Tan ug ang iyang mga ginsakupan.
Ang British national nga si Simon Lao maoy bugtong giabswelto tungod kay siya maoy gigamit sa prosecution isip state witness.
Ang kaso batok ni Tan ug mga kauban maoy katapusang kaso nga gihukman ni Judge Marilyn Lagura-Yap isip huwes sa Regional Trial Court sanglit natudlo naman siya nga associate justice sa Court of Appeals.
Maayo ang legacy nga gibilin ni Yap diha sa RTC sa Mandaue ug saludo ko sa iyang kaligdong.
Una nakong nahimamat si Yap niadtong piskal pa siya dihang iya ako nga gikuhang saksi sa usa ka kaso batok sa gidudahang drug pusher nga nadakpan niadto sa Task Force Banat.
Apan mas kumpleto unta ang maong legacy kun gihimo pa sa mga awtoridad ang pagpalawom sa imbestigasyon aron pag-ila kinsay mga local contacts sa sindikato.
Apan nahuman nalang ang husay sa kaso wa gyuy bisan usa ka local contact nga nadakpan ug napasakaan og kaso.
Dihay ilang gikiha niadto ang mga tag-iya sa bodega apan naabswelto sa korte.
Human niadto wala na tay nadunggan nga imbestigasyon paghukas sa maskara sa mga local contacts sa grupo ni Tan.
Imposible nga way local contacts ang grupo ni Tan tungod kay sagad nila mga langyaw nga posible nga wala gani masuhito sa dapit.
Kun gipadayon pa unta ang imbestigasyon hayan duna gyud untay mga local contacts nga apil sa mga napasakaan og kaso ug hayan nasilutan pud nga mabilanggo sa tibuok nilang kinabuhi.
* * *
- Latest
- Trending
