EDITORYAL - Kuwarta ug gahum giilogan karon

Ang kuwarta ug ang gugma sa pagkupot og gahum   mao gyuy kasagarang hinungdan sa pagkapukan sa mga tawong dungganan dinhi sa kalibotan.

Kini tungod kay ang kuwarta maoy gipaka-dios sa ubang mga tawo karon. Gawas sa kuwarta, ang uban diskontento kun di sila mahimong inila ug dungganang tawo sa katilingban.

Gumikan niini bisan nasayud sila nga silotanan ang paghimo og binuang piyongan na lang ang maong kamatuoran ug suwayan gyud kun madutlan ba sila.

Kun hidutlan, aw mao pay pag-ingnon, unsaon ta man.

Si Jesus Kristo sa wa pa Siya mamatay, gitintal Siya ni Satanas, gidala Siya ngadto sa usa ka mingaw nga lugar ug gisugo nga ang bato ipahimong pan, kay nagtuo si Satanas nga gigutom na si Kristo kay 40 diyas Siyang nagpuasa ug way kaon-kaon.

Apan giingnan si Satanas ni Kristo nga di lamang sa tinapay mabuhi ang tawo kundi, sa mga pulong sa Dios.

Kumo kay Satanas, wa gyud kini maminaw kang Kristo, iyang gitanyag ang tibuok kalibotan nga iyang ihatag kang Kristo kun kini mosimba lang kaniya, apan gitubag siya ni Kristo sa pag-ingon nga di ka angay magpasimba kay ikaw ang angay mosimba sa Dios, ug didto mikaratel og dagan si Satanas pahilayo kang Kristo kay nakita niya nga di gyud mahaylo og bahandi si Kristo.

Ambot kaha kun kini pang mga politiko nato karon maoy gitanyagan ni Satanas sa tibuok kalibotan, maglumba baya tingale.

Tiaw mo bay tibuok kalibotan imo na, unya ang imong amo mao si Satanas, busa imo na ang tanang kalipay, ug ang tanang bahandi.

Daghan baya tingale ang magdagan sa maong tanyag kay karon atong masaksihan nga luyo sa kadaginuton sa mga butang, buhaton gyud sa tawo ang tanang binuang aron lang mahimong gamhanan, dungganan, ug kuwartahan, busa manikas nalang gyud ug manlimbong bahala na og masikwati sila inig-abot sa panahon. Di ba?