Videoke

Nindot ang kanta ug ang pagkanta bahala na og sintunawo pa. Dili lang kini panindotay sa tingog o padak-anay sa grado sa score ihatag kundili aduna kini kalambigitan sa imong pagpahulay ug pagpa-release sa imong tension ug pressure sa kinabuhi. Ang pagkanta og videoke uban ang paghubog-hubog ang maisip natong lahi na nga sugilanon pud. Dugang pa, ang pag-videoke uban ang mga higala maoy usa ka tukmang higayon aron sa mga maayong hunahuna kita magbinayloay ug sa mga kasinatian kita magkapaambitay.

Ang kinabuhi usab sama sa usa ka kanta, dunay ritmo ug dunay tonada. Apan ang nakadaot kay kadaghanan kanato ang mibuot nga ang atong kaugalingong awit sa kinabuhi ang pagaawiton man hinuon sa uban. Kiwaw kaayo nga himuon nato ang ubang tawo nga maoy modumala sa atong kaugalingong mga lakang sa pagkab-ot sa giisip natong kalipay. Maayo man ang magpakitambag, ang maminaw sa mga panahom sa uban apan mas maayo nga human sa usa ka mapaminawong pakigkuyog kanila ikaw na gyud mismo ang mogunit sa imong mikropono aron awiton mo ang huni sa imong kaugalingong kinabuhi... Daw sa matay-og ang tibuok kuwarto sa dihang nising-al ako.

“If we go again all the way from the start, I will try to change things that killed our love...”

Diha pa ko kaamgo nga puno diay sa kahulogan ug lawom og dulot ang Scorpions.