Pasiuna

Kun maghisgot kita og pulong “Martir” kini nagagikan sa Griyegong pulong: “Martures” nga sa ato pa saksi. Ang saksi wala maghisgot sa iyang kaugalingon kondili nagsaksi siya alang sa uban. Sa laktod si Juan ang wala maghisgot sa iyang kaugalingon kondili ang naghisgot sa mosunod kaniya nga walay lain kundili si Jesus ang Kristo. Dili siya ang sentro kondili ang nagpunting sa Sentro nga mao si Jesus ang Kristo.

Pagpalawom

Sa kinabuhing Kristohanon usab, nahimong kabahin sa atong kinabuhi ang pagpanaw ingon nga dunay tumong. Diha sa atong paningkamot ug sa atong pagpanaw ato bang napangutana ang atong kaugalingon sa atong tumong? Kang kinsa man kita mosaksi? Ug sa unsa mang paagi kita misaksi?

Implikasyon niini sa atong inadlaw ug Kristohanong pagkinabuhi

Adunay panutlihon nga nagkanayon: “The greatest way of propagating the faith is to live a profound Christian life!” Ang si bisan kinsa ang mamahimong tinud-anay nga saksi sa Ginoo kun iyang puy-an ang iyang pagka-Kristohanon dili sa ngalan lamang (Nominal Christian) kundili diha usab sa buhat (Practising Christian). Sama pananglit sa usa ka ginikanan nga naningkamot nga ipakita ang iyang pagka-Kristohanong ginikanan diha sa pagtuman sa iyang kaakuhan diha sa pagpaningkamot diha sa panginabuhian ug paggahin og de-kalidad nga panahon alang sa iyang mga anak.

Pangilin karon ni Senyor Santo Niño ug gidapit kita sa pagpuyo sa kinabuhi sa pagsaksi pinaagi sa mapaubsanong pagpangalagad ngadto sa uban. Kini ang tinud-anay nga kahulogan sa pagka-Kristohanong saksi ang pag-alagad ug dili ang magpaalagad.