Walay gahum ang kamatayon

AGOSTO 15, 2010: Solemnidad sa pagpasaka sa langit sa mahal nga Birhen Maria (Assumption of the Blessed Virgin Mary)

Mga Pagbasa: Gip. 11; 19a; 12; 1-6a, 10/1Cor/ 15;20-27a/Lk. 1;39-56

Ang atong mga kaigsuonan sa Silangang Rito (Eastern Rite/Greek Orthodox) ang misaulog ning maong kasaulogan uban ang dakong pagtahod ug ka-solemne. Gitawag kini nila og “Dormitio” nga sa ato pa ang paghikatulog sa Mahal nga Birhen Maria diin gipasaka siya sa langit lawas ug kalag. Nagpadayag kini sa dangatan sa matag anak sa Dios sa katapusang mga adlaw diin, mahuptan niya ang bag-ong tipo o matang sa pagkinabuhi diha sa mahimayaong pagpuyo sa kinabuhi sa kabanhawan.

Niadtong tuig 1950 si Papa Pio XII (Dose) ang mibatbat kalabot sa mahimayaong “Pagpasaka” sa Langit sa Mahal nga Birhen Maria ingon nga Dogma of Faith diha sa usa ka Konstitusyon Apostolika: “Munificentissimus Deus”...We pronounce, declare, and define it to be a divinely revealed dogma that the Immaculate Mother of God, the ever Virgin Mary, having completed the course of her earthly life, was assumed body soul into heavenly glory.” (cf. Komonchak et., al. The Dictionary of Theology p. 70). Kining maong pribilehiyo sa atong mahal nga Inahan ang wala magsukad sa iyang pagka-inahan lamang sa atong Ginoo, hinunoa nahimo kining ganti sa iyang pagkamasinugtanon sa kabubut-on sa Dios nga tungod niini, gipahimugso niya ug iyang gimatuto ang “Pulong nga Nagpakatawo” nga mao si Jesu-Cristo.” Angayan lamang nga atong pamalandongan kining mosunod:

1. Kining maong solemnidad ang nagtudlo kanato nga kita ang wala lalanga sa Dios alang sa kalibutan nga lumalabay kondili alang sa kinabuhing tunhay ug mahimayaon.

2. Mao nga imbis mahadlok kita sa kamatayon nga nakapahimo kanatong “napilit” diha sa usa ka mahadlokong panlantaw sa umaabot mas haom nga atong awaton ang kinaiya sa Mahal nga Inahan diha sa Pagtuo sa Dios.

3. Matang kini sa pagtuo nga magtukmod kanato sa Paglihok. (Pagtinarong ug pagbuhat sa maayo sa tanang adlaw sa atong kinabuhi.

4. Hinuon, mituo kita sa Dios dili tungod sa langit o sa kahadlok sa impiyerno, kondili tungod kay gihigugma nato ang Dios sa tinuoray gayud.