Krimen

Misiaw na usab ang krimen dinhi sa dakbayan sa Sugbo ug ang kasagaran sa mga nabiktima mao kadtong mga yanong dumudoong ug mismong mga Sugbuanon. Maghilak ang adlaw dinhi sa dakbayan sa Sugbo kun walay tulis, labni, dunggab, pusil ug uban pang krimen.

Agi og tubag, inabagan sa mga barangay tanod ug mga sakop sa Barangay Intelligence Network ang kapulisan mihimo og mga check point sa halos tanang kadalanan sa dakbayan apan aduna gihapoy nakalusot nga mga kriminal. Ngano kaha? Ang tubag! Lugak ra ang gipatumang seguridad para sa katawhan. May mga check point tuod nga gipatuman ang kapulisan dinhi sa dakbayan apan wa kini maka-check sa point tungod kay gipili lang ang ilang gi-check. Mga sakyanang de pasaheroan ug motorsiklo lang ang giusisa sa mga police. Wa nila apila sa pagsusi ang mga taxi unit ug pribadong mga sakyanan. Di upod nila i-apil sa pag-usisa ang mga babayeng pasahero nga posibleng mao na ang padad-on sa armas sa mga kriminal.

Sigon sa akong nakita ang mga check point nga gihimo sa mga police compliance lamang sa kamandoan sa ilang labaw ug dili gayod tuyo niini ang pagsikop sa mga kriminal ug pagpahunong sa krimen. Ang uban nga nag-check point mura lag nagduwa-duwa. Ang check point nga gihimo paglangay-langay lang sa mga pasahero ug dili ang paghatag niini og kaseguroan gikan sa mga kriminal (sama sa mga tulisan) sa ilang paglabigar. Lugak ra kaayo ang check point ug makalusot gayod ang mga kriminal nga haniti na kaayo nga motago og armas. Mas maayo pa usab sa atong mga police nga nag-check point ang mga security guard sa mga dagkong tindahan kay aduna pay kahimanan sa pag-ila sa mga armas nga gitagoan. Maong mas maayo seguro nga i-address sa kadagkoan sa atong kapulisan kining maong suliran.

Gawas sa lugak nga check point, on and off usab ang police visibility nga gipatuman hinungdan nga way pupanagana nga mohimog krimen ang mga kriminal.

Mat-an pas pinya ang mga kriminal busa mas maayo seguro nga di motugot ang atong kapulisan nga mausahan sa mga kriminal.