Terrorismo sa Sugbo

Napalpak man tuod ang tinguha sa gidudahang mga membro sa Rajah Sulayman Group pagpa-ulbo sa bombang ilang gitanum atubangan sa SM City Cebu, apan milampus sila paghatud sa mensahi sa terrorismo ngadto sa katawhan ug sa atong mga opisyal.

Ang kamatuoran nga dunay naglihok nga mga sakop sa terrorista dinhi sa Sugbo igo na nga makalisang kanato bisan og wa pay bombang gipaulbo ang maong mga tawo. Kini tungod kay kita sayod nga bisan unsang orasa mamahimo silang mangataki ug posibling daghang mga kinabuhi ang makalas.

Atong dawaton ang makatuoran nga dili sa tanang higayon mabantayan sa kapolisan ug sa militar ang kalihukan sa maong grupo. Maayo lang gani nga ang hitabo didto sa SM niadtong Huwebes sa gabii nabantayan sa nagpakabanang sibilyan ug gwardiya sa maong tindahan.

Sayod ang tanan nga dili garantisado ang intelligence sa atong kapolisan ug militar aron pagsanta sa kalihukan sa mga terrorista. Kon, nakalusot ang mga terrorista pagpangatake didto sa Amerika pipila na ka tuig ang nakalabay taliwa sa moderno ug kusgan nilang intelligence units, sisiw, kon sa pinulongan pa sa mga estambay ang paghimo og terrorismo dinhi sa Pilipinas labi pa sa Sugbo.

Husto ang batasan nga gisagop ni Mayor Tomas Osmeña bisan pa og kini maisip nga paranoya tungod kay dili na mabalik ang kinabuhi nga makalas kon simbako dunay bomba nga mapaulbo ang mga terrorista.

Ang aktibong pakigtambayayong sa katawhan ngadto sa awtoridad dako og ikatabang aron mabuntog ang hulga sa terorismo dinhi sa Sugbo. May sukaranan pod ang katahap sa mayor nga posibling nagbansaybansay ang mga terorista pagpangandam sa dakong kalihukan dinhi sa Sugbo karong Disyembre, diin ang mga lider sa mga nasud nga naglangkob sa South East Asian Nations mopahigayon og summit.

Busa angayan nga karon pa lang sugdan na sab sa kapolisan ug militar ang pagpahugot sa ilang intelligence monitoring. Angayang tan-awon og maayo ang tanang mga paagi nga posibling gamiton sa mga terrorista paghimo og kadaot.

Usa sa akong nalantawan nga posibling gamiton sa mga terrorista mao ang paagi nga ilang gigamit sa twin towers niadtong September 11, 2001, diin ilang gibangga ang eruplano sa maong higanteng mga edipisyo.

Nabalaka ko nga ang susamang paagi gamiton sa mga terrorista tungod kay dunay mga gagmay'ng abyon diha sa Lapulapu, sama sa nahagsa niadtong Sabado sa hapon, nga mamahimo nilang abangan aron gamiton sa pagpangatake.

Kinsay nasayod nga karon palang duna nay mga sakop sa mga terrorista nga mikuha og flying lesson diha sa Lapulapu aron atol unya sa Disyembre sayon nalang alang kanila ang pagpalupad og eruplano pagpangatake.

Ang maong posibilidad, bisan og mahulagway kaha nga "wild imagination" apan dili kini imposibling mahitabo. Busa angayang karon palang panid-an daan sa militar ug kapolisan ang mga nagtoon og flying lesson diha sa Lapulapu ug sa ubang dapit sa nasud.

Kay sa gikaingon na ni mayor Osmeña di bali nga tawgon nga "paranoid" basta malikayan ang bisan unsang katalagman.

* * *

E-mail: [email protected]