EDITORYAL – Pahalipay sa Lumad Basakanon

Among pahalipay ngadto sa Lumad Basakanon kinsa maoy nakadaug sa grand championship sa Aliwan Grand Fiesta festivals competition nga gipahigayon didto sa Manila niadtong miaging Domingo.

Ang Lumad Basakanon maoy official entry sa dakbayan sa Sugbo sa maong grand fiesta diin kapin sa 20 ka laing mga pundok gikan sa nagkadaiyang dapit sa nasud ang nakigtigi usab alang sa kampeonato diin ang ganti niini gawas sa tropeyo mao ang P1 milyon.

Daghang problema ang giatubang sa Lumad Basakanon gikan sa ilang paggikan sa Sugbo hangtud sa ilang pag-abot sa Manila, apan tungod sa determinasyon nga ilang makab-ot ang kadaugan alang sa kadungganan sa Sugbo nagmalampuson sila.

Kami dinhi sa Banat News miduyog sa tibuok nga komunidad sa pagtunol og pahalipay ngadto sa Lumad Basakanon alang sa kadaugan niini nga nakahatag og kadungganan sa Sugbo.