Tinuod nga bida
Siyay labing andam. Siya say labing duka. Si Senador Risa Hontiveros ang labing kugihan, lawom ug suhito sa kontrobersiya ni Bamban, Tarlac, Mayor Alice Guo. Pero siya sab ang labing hipos. Bisan siya ang labing daghan og pangutana. Ug maoy tinuod nga bida sa upat ka oras nga labing uwahing hugna sa ilang imbestigasyon sa Senado.
Karibalan lang ang iyang kaduka sa undanong mga pangutana ni Sherwin Gatchalian. Mas maayong nipaukyab ang ilang kaubanan nga silang Raffy Tulfo, Jinggoy Estrada, ug Loren Legarda. Bisan sa kataphaw sa ilang mga tampo.
* * *
Nisuway si Legarda paglugit og dugang detalye sa pagkabata ni Guo sa babuyan. Pero wa siya kahibawo unsaon. Hangtod naapsan sa iyang sapot. Nipahimangno si Tulfo nga hatagan daan og toalya kay segurong panington si Guo sa iyang mga pangutana. Iyang bakikaw nga pangisog maoy nihungaw.
Mas makaluluoy si Jinggoy sa iyang blind item nga mayor sa Pangasinan ang kaipon ni Guo ug maoy tinuod nga nagkontrolar sa operasyon POGO sa Bamban. Giduwa-duwaan siya ni Guo sa pagpasalig nga way bana, uyab, ni kapuyo. Nabistong showbiz ang iyang pangandam.
* * *
Sa tingog nga mahimong nasobrahan ra kakalma ug sa pinangutan-an nga mahimong mas masabtan kon wa kaayo isunud-sunod, nilampos si Hontiveros sa pagbisto sa dugang pamakak ni Guo:
Nga pinaangkan ang iyang inahan kay may dokumento nga nagpakita nga nakasal ang iyang amahan ug inahan sa 1982, upat ka tuig sa wa pa siya matawo;
Nga siya ray bugtong anak kay may dokumento nga nagpakita nga human natawo si Guo sa 1986, duna siyay mga manghod nga ang usa natawo sa 1988;
* * *
Nga wa kaila sa iyang mga igsuon kay silang tulo ang nalista nga mga tag-iya sa tanan nilang kompaniya ug nagkuyog sila sa babaye niyang igsuon sa labing menos tulo ka biyahe; ug
Nga wa siyay labot sa POGO tungod sa posibilidad nga sumpay ra sa mga negosyo ni Guo kay managsama ang email address sa Hongsheng Gaming Technology Inc. (POGO nga gironda sa Pebrero 2023), Zuan Yuan Technology Inc. (POGO nga gironda sa Marso 2024), ug ni Nancy Gamo (representante sa mga kompaniya ni Guo, sa Hongsheng ug sa Zuan Yuan).
- Latest
