Mas epektibong panghudlat

Ambot unsay atraso sa Nobyembre. Kaduha na pasidan-i ang publiko nga dunay mokusu-kusong super typhoon: Una, niadtong Nobyembre 3, liwas sa Kalag-kalag; ug ikaduha, karong semanaha. Wa matinuod ang unang pasidaan. Tanang timaan nagpakita nga sayop sab ang ikaduha.

Di gikan sa Philippine Atmospheric, Geophysical and Astronomical Services Administration (PAGASA) ang kasayuran. Kon dili gikan sa iresponsable nga tigpakatap og text ug chat messages. Nga gi-forward ug gi-share ngadto sa mas daghan. Ug niawas sa posts sa social media. Kansang pangaliya para sa Sugbo wa kaiban sa kabangis sa pagpangilad.

* * *

Nipasidaan ang PAGASA sa niaging semana og bagyo, pero way hisgot nga susama ni Odette o Yolanda ang umaabot: Low pressure area (LPA) gawas sa Philippine Area of Responsibility (PAR) mahimong tropical depression sa di pa mosud ug mas mokusog kon makasud sa PAR karong semanaha.

Nigara dayong mga tigpakatap og fake news. Gikabay-an nilang ika-33 nga anibersaryo sa bagyong Ruping niadtong Lunes. Timaan sa pataka maong pagpatuo nga ang nag-ung-ong nga bagyo nganlan og Hamas. Nga wa sa lista sa PAGASA karong tuiga. Ug sa bisan unsang tuig.

* * *

Nisamot ang kabalaka dihang nahimong tropical depression niadtong Martes. Wa mohupas bisan nihuyang sa pagka LPA niadtong Miyerkules. Padayon ang panghadlok sa chat groups ug social media tungod sa kapakyas sa adlaw pagpakita ug sa pat-ak pat-ak nga uwan tibuok adlaw gahapon, Huwebes.

Bahala na nga wa mahitabo ang mga pangagpas sa PAGASA nga 1.) Mahimong mokusog pagbalik pagka tropical depression ug 2.) Mosud na sa PAR niadtong Miyerkules sa gabii o gahapon sa kadlawon.

* * *

Nakatampo sa kalibog ang ka way klaro sa cloud formation. Nga gihulagway sa PAGASA nakatag tungod sa kabugnaw sa palibot. Pero nipakapin og pasidaan nga mahimong maporma ug mokusog pagbalik, kay mas init ang kadagatan sud sa PAR.

Matod sa PAGASA, ma-LPA o ma-bagyo man, uwanon ang Sugbo karong weekend kay mokusog ang Amihan. Ang termino nga ilang gigamit mao ang di pamilyar nga “Shear Line.” O panag-abot sa Amihan (bugnaw nga hangin gikan sa Siberia) ug Easterlies (init nga hangin sa Pasipiko). Mas daling mahinumdoman (ug mas kahadlokan) ang iresponsable nga panghulga sa super typhoon ug Hamas.