Taphaw nga lahugay sa PNP
Timaan nga way klaro ang gipasiatab sa administrasyon ni Presidente Ferdinand Marcos Jr. nga paglimpiyo sa kapolisan gikan sa mga heneral ug mga koronel nga gipasanginlang konsabo sa ilegal nga drugas:
• Usa ka semana human dawata sa presidente ang ilang courtesy resignations, 13 sa 18 ka mga opisyal nagpabilin pa sa puwesto; kay
• Wa pay nadawat nga sugo gikan ni PNP Chief Benjamin Acorda nga nagrelibo nila gikan sa ilang mga puwesto; kay
• Wa pang kahibawo kon tangtangon ba lang sa ilang mga puwesto o taktakon g’yud gikan sa PNP.
***
Ang nidemanda sa courtesy resignations sa dul-an sa libo ka mga heneral ug full colonels sa PNP niadtong Enero ning tuiga mao si Kalihim Benhur Abalos sa Department of the Interior and Local Government (DILG). Siya ang direktang nagduma sa PNP. Siya unta ang angay nga nigiya ni Acorda unsay angayng himuon human dawata ang courtesy resignations.
Ambot tungod ba sa kalibog, o sa ka way klaro sa sugo sa DILG, imbes mangonsulta ni Abalos, si Acorda nipahibawo nga adto mangayo og katin-awan ni Executive Secretary Lucas Bersamin sa Malacañang.
***
O mahimong nagkinahanglan sila si Acorda, Abalos, ug Marcos sa tambag sa kanhi chief justice sa Korte Suprema. Tungod sa nitumaw nga mas dako nga kontrobersiya: Di diay courtesy resignations ang gidawat sa presidente, kon dili usa lang ka “undertaking” nga namirma nga 953 ka mga opisyal sa PNP andam magpa-imbestigar sa five-man committee nga gipangulohan nilang Baguio City Mayor Benjamin Magalong ug karon Defense Secretary Gibo Teodoro.
Samang “undertaking” niklaro nga mo-resign lang ang mga opisyal kon mapamatud-an ang mga pasangil batok nila.
***
Si Bersamin ang unang motambag nilang Acorda, Abalos, ug Marcos nga mapamatud-an lang ang mga pasangil nga konsabo sa ilegal nga drugas ang tulo ka heneral ug 15 ka koronel kon pormal silang pasakaan og kaso ug hatagan sila og higayon pagpanalipod sa ilang kaugalingon. Nga, tungod sa kalidad sa atong sistema sa hustisya, mahimong siyam-siyaman.
Naabtikan ba sa mga opisyal sa PNP si Abalos dihang namirma sila sugod niadtong Enero? O napugos si Abalos sa pagsugot sa “undertaking” aron nga di moalsa ang labing dagkong opisyal sa PNP?
- Latest
