Pagbaraw sa kalibotanong puhalay
Atubangan sa kalibotanon nga lumba sa pagpangompra sa bakuna o mga bakuna nga unang mapamatud-an nga luwas ug epektibo batok sa Covid-19, ang kinakusgan nga alyado sa Pilipinas ug ubang kabos nga mga nasud mao ang COVAX, ang kampanya sa World Health Organization (WHO) alang sa mas makiangayon nga pagpamakuna sa labing nagkinahanglan nga mga molupyo bisan unsay ekonomikanhong kahimtang ug asay nahimutangan sa ilang mga nasud.
Sa labing uwahing ihap, niabot na og 170 ka nasud ang nagpalista, nga naglakip sa 64 ka adunahan nga mga nasud, pagtampo sa kalibotanong pundo.
* * *
Apan ang COVAX, sama sa ubang kalihokan sa WHO, nahiagom og higanteng limitasyon aron kapahimuslan sa kinabag-an sa kapin sa pito ka bilyon nga kalibotanong populasyon:
Wa moapil ang Estados Unidos ug ubang adunahan nga mga nasud nga nag-iyahay sa pagkontrata sa mga pabrika sa nag-una nga mga kandidatong bakuna;
Duha ra ka pabrika ang ilang nakontrata, ang Sanofi ug GlaxoSmithKline, kon maaprobahan ang ilang mga bakuna nga wa maapil sa mga gipaabot nga kahatagan og pagtugot karong tuiga; ug
20% ra sa populasyon sa nagpalistang mga nasud ang mabakunahan.
* * *
Kay di man mahimong 21 milyones ra ka Pilipinhon ang mabakunahan batok sa Covid-19 sunod tuig, nga mao ray mahatag sa COVAX, ang Pilipinas mapugos sa pakigsabot sa ubang mga pabrika sa bakuna.
Human nipasalig nga maapil ta sa labing una nga makapahimus sa mga bakuna sa China ug Russia, niangkon na si Presidente Rodrigo Duterte nga di nang kareserba ang iyang pamunoan sa nag-unang mga tinubdan sa bakuna kay naunhan na sa ubang kanasuran.
* * *
Ambot kon molambo ba ang kalibotanong pagtinabangay, inay ang salawayon nga puhalay, batok sa pandemya kon makabanos na sa White House si President-elect Joe Biden sa hangtod karon nagdumili pa pag-angkon sa iyang kapildehan nga si Outgoing President Donald Trump.
Mas pait ang umaabot kon ang pagpalayas ni Trump di makapapas sa nakabuylo nang bisyo sa susama niyang mga pangu sa kanasuran nga determinadong ni-ulug-ulog sa ilang katawhan sinalikway ang mga pasidaan nga di mabadlong ang pandemya kon pasagdan ang labing kabos nga mga nasud nga hukas sa padayon nga pagpanghasi sa bangis nga kagaw.
- Latest
