Naunay sa tari

Inig pahibawo sa Malakanyang sa resulta sa paghiling sa mga doktor sa tutonlan ug tinai ni Presidente Rodrigo Duterte, mahimong di na si Harry Roque ang iyang tigpamaba. Nipahibawo si Roque nga mamalandong siya karong weekend kon magpabilin pa ba sa katungdanan o mangita og laing kapilian.

Ang lain niyang kapilian mao ang pagdagan pagka senador sa piniliay sunod tuig o ang laing katungdanan nga gitanyag ni Presidente Duterte niya. Di sayon ang pamalandong ni Roque. Kay naunay siya sa sigehan niya og dupa nga way lipud-lipod nga sinultihan sa presidente.

* * *

Nikumpisal si Roque nga nauwaw siya dihang gipahibawo sa presidente nga niadto siya sa Cardinal Santos Medical Center sa San Juan City ug gihiling sa mga doktor sud sa usa ka oras. Wa ipahibawo sa presidente unsang orasa siyang niadto apan ang ubang mga pasyente nakakita sa mga sakop sa Presidential Security Group sa alas-3 sa kadlawon ug sa presidente mismo pagka alas-3:30 sa kadlawon.

Nasubo si Roque nga kapasanginlan nang bakakon. Kay labihan man niyang pangugat nga wa ma-ospital ang presidente, igo lang nipahuway maong wa katambong sa iyang kalihokan niadtong Miyerkules.

* * *

Kon di tinuyo ang pamakak ni Roque, mas lisod niyang dawaton ang implikasyon nga mahimong wa na siya saligi sa presidente, kay gawas nga wa pahibaw-a sa pagpahiling sa mga doktor wa pa g’yud hatagi og kahigayonan nga maoy unang makatul-id sa sayop niyang sulti.

Nahibawo siya sa tinuod nga lakaw sa presidente dungan natong kasarangang mga magbubuhis atol sa pakigpung ni Presidente Duterte atubangan sa alumni sa Philippine Military Academy pagka Huwebes na.

* * *

Ang pakapin ni Presidente Duterte gihulagway ni Roque nga bangis nga pagmahal: Gipahibawo nga di modaog pagka senador si Roque kay di ganahan ang mga sundawo niya ug busa hatagan na lang niya og laing trabaho.

Matod ni Roque wa pa siya pahibaw-a sa presidente unsay bag-o niyang trabaho apan mahimong maglambigit gihapon sa iyang pagka tigpamaba. Ambot maglakip ba unya sa pagpasabot unsay “samples” nga gikuha sa mga doktor gikan sa tutonlan ug tinai sa presidente, may gipahigayon bang biopsy ug tinuod bang mga pagduda nga duna siyay kanser.