Ang K-12 giyam-iran
Kon dili nimo hinuktokan pag-ayo, makaingon ka gayud nga dili angay’ng tukoran og flyover ang dapit diha sa Gorordo Avenue eskena Sudlon Street sa Barangay Lahug.
Kini maoy naabot gani dayon sa akong hunahuna pagkabasa nako sa balita nga gisugyot sa kadagkoan sa Department of Public Works and Highways (DPWH) ang pagmugna og flyover project diha sa maong bahin sa karsada.
Gihinuktokan nako pag-ayo ang sitwasyon. Karon makasinati na og panagsa nga traffic congestion ang eskena Gorordo Avenue-Sudlon Street kay daghan man nga mga sakyanan nga gikan sa Gorordo nga mo-left turn paingon sa Sudlon ingon man kadtong gikan sa Sudlon Street nga mo-left turn usab paingon sa JY Square.
Tinuod ang panglantaw sa DPWH. Kon dili butangan og flyover ang maong dapit, makasinati kini og grabe nga problema sa trapiko. Abi ninyo og ngano? Hapit na mahuman ang pag-ayo sa karsada nga magdugtong sa Guadalupe ug Kalunasan.
Ang duha ka barangay gibuwag kini sa dakong sapa ug samtang dugay ra nga nahuman ang taytayan nga gitukod sa DPWH, ang naguba nga karsada daplin sa sapa wala pa mahuman sa pag-ayo.
Kon magamit na ang maong karsada, daghan na nga mga sakyanan nga gikan sa Lahug anha na moagi diha kon mopaingon sila sa Guadalupe o kaha Banawa. Ingon usab niini ang buhaton niadtong gikan sa Guadalupe nga moadto sa Lahug.
Sa ato pa, modaghan ang mga sakyanan nga moagi sa Sudlon Street kay anha man molusot ang mga sakyanan nga gikan sa Guadalupe, pun-an pa sa mga sakyanan nga gikan sa karsada kilid sa Kapitolyo.
Nasabtan nako nganong gusto sa DPWH nga butangan daan og flyover ang maong dapit. Ang laing maayo butangan og flyover mao ang eskena Salinas Drive ug Gorordo aron kadtong mopaingon sa Trans-Central Highway dili na mabara sa ilang pag-agi.
Kon may flyover na sa maong dapit dili na maglinya pa ang mga sakyanan nga gikan sa Apas nga maglumbay tawon nga maghuwat nga makahuman na pag-agi kadtong mga sakyanan nga anaa sa pikas.
Samtang gusto ko nga ang dakbayan adunay mga lagpad nga karsada, apan kinahanglan usab ang flyovers kay pinaagi niini mosirit ra ang dagan sa mga sakyanan.
* * *
Grabeha diay kadaghan sa mga classrooms nga kuwang pa dinhi sa dakbayan sa Sugbo uy.
Natan-aw nako sa lista nga akong nahuptan, ang Cebu City adunay 2,044 ka classrooms alang sa public elementary ug 816 sa high school. Sigun sa lista nga gisumiter sa kadagkoan sa Department of Education, nagkinahanglan kita og dugang 446 ka classrooms sa elementary ug 332 sa high school. Ang kinder kinahanglan usab og 381.
Abi ninyo og pila ang kinatibuk-ang kantidad nga gastohon niini? Magkinahanglan kita og kapin sa P800 milyones. Unya, ang mga armchairs, kinahanglan usab kita 27,000 sa high school, 22,000 sa elementary ug 4,000 sa kinder nga ang tanan moabot og P53.4 milyones.
Unya, kay magdugang man kita og mga classrooms ug lingkoranan, natural magdugang usab kita og maestra. Matud sa DepEd nga kinahanglan kita dinhi sa dakbayan sa Sugbo og dugang P242 milyones nga budget aron pag-hire og additional teachers.
* * *
Pabor gayud ko nga awhagon nato si DepEd Secretary Armin Luistro nga mo-resign sa katungdanan kay miinsister siya pagpatuman sa mando sa Presidente kabahin sa K-12 Program.
Kon ang plano nila ni Presidente Aquino ug ni Luistro maayo kay aron kuno dali ra nga madawat og trabaho sa gawas sa nasud ang mga Filipino, dili tingali ipugos nato kini sa uban. Kadtong gusto nga mokuha og K-12 mobayad sila og special classes.
Gamay ra kaayo ang porsyento sa mga Filipino nga mo-abroad ug adto manarbaho apan apektado sila sa gipatuman nga programa ni Presidente Aquino. Kini maoy punto nga kon makahimo pa lang pagpapili pag-usab ang Presidente, mokampanya na gayud ko nga dili siya maayong botohan.
Sayud ko nga daghan ang wala malipay sa pagatuman sa K-12 Program. Apil ang mga maestra nga akong nahinabi wala makagusto apan hadlok lang sila nga mohatag sa ilang komentaryo.
- Latest
- Trending
